Shillong, Jylliew 09:
Khnang ban pynkhie im bad ban kyntiew ïa ki jingïalehkai sawangka (drama) Khasi ha kylleng ki rynsan bapher bapher wat sha kiwei pat ki jylla jong ka Ri bad shabar ka ri India ruh kumjuh da kaba pynkylla ïa ki jingïalehkai sawangka sha kiwei pat ki jait ktien jong ka pyrthei, ka Seng Biria U Khasi (SBUK) ha ryngkat ka jingïatreilang bad ka Fraternity Art Cine Entertainment Shillong (FACES) ha ka 2 tarik u Jylliew 2023, ki la mynjur ban ïatreilang bad pynphriang ïa kane jingïalehkai sawangka Khasi.
Ïa katei ka rai ban ïatreilang hapdeng ka SBUK bad ka FACES ka la paw ruh hadien ba ki nongïalam jong kitei ar tylli ki kynhun kiba kynthup ïa u President, Bah W. Kharkrang bad u General Secretary, Bah M. Dkhartmar kum ki nongïalam jong ka SBUK bad u Bah Pradip Kurbah bad u Bah Merlvin Mukhim kum ki nongmikhmat jong ka FACES, ki la ïasoi ïa ka dulir jong ka soskular ban ïatreilang ha ka sngi Thohdieng ha ka jingïakynduh lang bad ki lad pathai khubor ha Shillong Press Club.
Kitei ar tylli ki kynhun kin sa pynkhreh ruh ban pynlong ïa ki prokram bad kaba kham paw eh kan dei ka tamasa sawangka lane ka ‘Drama Festival’ ka ban sa pynlong ha ki bnai ki ban sa wan.
Haba kren sha ki lad pathai khubor ha ka Sngi Thohdieng, u Bah M Dkhartmar uba dei u General Secretary ka SBUK, u la ong ba ki mat jingïakren bad ki rai kiba la mynjur hapdeng ka jingïakynduh lang jong kitei ar tylli ki kynhun ki long ba ki la mynjur ruh ban Co-op kum ki Associate Member jong ka SBUK, kata 2 ngut ki shynrang bad 2 ngut ki kynthei ki ban dei na ki dkhot ka FACES. Kumta la aiti ha u Pradip Kurbah ban thung ïa kita ki Associate Member bad lah ban kynthup shuh shuh na ka FACES kum ki Associate Member jong ka SBUK hadien lada donkam.
U Bah Dkhartnar u la ong ba kitei ar tylli ki kynhun ki la mynjur ruh ban pdiang ïa u Bah Pradip Kurbah kum u nongai jingmut jong ka SBUK bad halor ka jinglut jingsep bad ki jingmih na kino kino ki sawangka ba pynlong da ka SBUK bad ka FACES, yn sa pynbeit janai da ka jingïasyllok lang jong baroh arliang ki kynhun.
Shuh shuh u Bah Dkhartmar u la ong ba kitei kynhun ki la mynjur ruh na ka liang ka SBUK un long ma u kum u nongkren bad u Bah Pradip pat kum u nongmihkhmat jong ka FACES. Nangta ka la don ka jingïamynjur ruh ba ka FACES kan lah ban pyndonkam ïa ka shap, ka muhor jong ka SBUK ha kaba ïadei bad ki prokram bapher bapher bad kiwei kiwei ki jingmynjur.
U Bah M. Dkhartmar u la ong ba watla kane ka kam ka dang kham shimpor ban urlong namar ba ka donkam shibun ka por bad ka jingtrei shitom. Nalor kata, u la pynpaw ruh ka jingsngewsarong ba ka SBUK da ka jingïohi jngai bad ka jingsaiñ dur jong u President ka SBUK, Bah W. Kharkrang ha ka 5 tarik u bnai Nailur 2015, kaba long ka sngi jong ki nonghikai, la lah ban plie ïa ka Khasi Learning Centre; kaba dei ka skul hikai Khasi ïa kito ki briew ki bym dei ki Khasi khlem da shim kano kano ka jingsiew.
Na ka liang u Bah Pradip Kurbah, u la pynpaw ba u dap da ka jingkmen ba ka SBUK ka la treh ban ïatreilang bad ka FACES bad ka jingïatreilang jong kine ki ar kynhun ka long ban pynim ïa ka kam sawangka hapoh nongbah Shillong.
