Jowai, Jylliew 09:
Ka Red FM 93.5, Shillong bad ka tnat treikam ka pule-puthi hapoh ka jingpeit u State Project Director, SEMAM, Meghalaya, Shillong ryngkat ka jingïatreilang ka shlem treikam District Mission Coordinator, SSA West Jaiñtia Hills bad District School Education Officer, West Jaiñtia Hills ha ka 8 tarik u Jylliew ki la pynlong ïa ka prokram kyrpang na ka bynta ki khynnah skul ha H.K. Singh Memorial Secondary School, Jowai.
Kane ka dei ka prokram ba la pynwandur kyrpang da ka Sorkar India haba ïadei bad ka thong jong ka NIPUN Bharat bad G-20 halor ka phang “Ensuring Foundation Literacy and Numeracy especially in the context of blended learning” bad la tip ruh da kawei ka kyrteng ïa kane ka prokram kum ka “Jan Bhagidari Events and Activities” ha kaba ki nongïoh myntoi na kane ka prokram kin long ki khynnah skul ba pule ha ka kyrdan Pre-Primary haduh klas III.
Kum ban maitphang ïa kane ka prokram, la ïoh ka jingkren lyngkot na ka Kong M. Lakiang, DMC-SSA West Jaiñtia Hills bad pynbud pat sa ka jingpule ïa ka NIPUN Bharat Pledge da baroh ki khynnah skul bad ki nonghikai katba ïa ki kyntien kyrpang halor ka NIPUN Bharat la kren da ka Kong M.W. Lynrah, State Coordinator Pedagogy SEMAM-SSA, Meghalaya Shillong.
Ka Kong Lynrah haba ai jingkren, ka la batai ïa ki khynnah shaphang ka thong jong ka NIPUN Bharat ne ka ‘National Initiative for Proficiency in Reading and Understanding with Numeracy’ bad ka la ïathuh ruh ba ïa kane ka prokram la tip ruh kum ka ‘Janbhagidari Events and Activities’ ïa kaba la sdang naduh ka 1 tarik u Jylliew bad kan kut pat ha ka 15 tarik u Jylliew.
Ka la ong ba ha Meghalaya la pynlong ïa kane ka prokram ha man ki distrik ha kaba ki khynnah kin ïoh jingmyntoi shibun lyngba ki prokram bapher-bapher ba kynthup ïa ka jingïathuhkhana ïa ki khynnah kiba pule ha ki UKG-LKG, ‘Exhibition of TLM Mela’, ‘Bicycle Rally’ bad kiwei-kiwei kiba lah ban khring ïa ka pyrkhat pyrdaiñ jong ki khynnah.
