Shillong, Jylliew 09:
Ki nongshong die dohkha ha Ïewduh hapoh ka kynhun Khasi Jaiñtia Fish Whole-salers’ and Retailers’ Associa -tion ha ka Sngi Thohdieng ki la ïalum bad khang kynsan ïa ki dukan da ka jinglyngngoh bad long kumba ïuh tdong bseiñ mar ïa ïoh jingtip ba ïa ki dohkha la lap ba la khleh da ka dawai ‘Formalin’.
Na ka liang ka Commissioner of Food Safety ka sorkar jylla, ka Kong R.M Kurbah ha ka 8 tarik Jylliew 2023, ka la pynmih ïa ka hukum ban khang ïa ka jingwanrah dohkha nabar jylla haduh 15 sngi kynthih hadien ka jinglap jong ka tnad ba ki don haduh 30 tylli ki dohkha kiba la khleh da ka dawai Formalin kaba lah ban ktah ïa ka met ka phad bad ka koit ka khiah jong ki paidbah bad na ka liang jong katei ka kynhun ki nongdie dohkha ki la pan da ka jingpynshai ba mynno ka tnad ka la phah peit bniah ban pynshisha ba ki dohkha kiba la wanrah na shabar ka jylla ki dei kiba la leh da ka dawai ‘Formalin’
Haba kren sha ki lad pathai khubor ha ka Sngi Thohdieng, na ka liang u Bah C. Wankhar uba dei u dkhot ka seng ki nongdie dohkha, u la pynpaw ka jingsngewlyngngoh kaba khraw hadien ba ki la ïoh jingtip halor kane ka jingphah khang bad ka jingong ban daiñ kuna T. 10 lak ha ryngkat ka jingshah set patok haduh 7 snem lada kitei ki nongdie dohkha ki pynïaid ïew ïa ki dohkha ba la khleh dawai ‘Formalin’.
U Bah Wankhar u la pyni ruh da ka kot syrnot ba ïa ki dohkha la wanrah na Andhra Pradesh da kaba pynshisha ba kam don kano kano ka jingkhleh dawai bad u la kyrpad ruh na ka Commissioner of Food Safety ka sorkar jylla ba kan ïatreilang da kaba wan khmih ïa ki dohkha ha Ïew khnang ba kan don ka jingsngewthuh jingmut bad ban ïa tip lang.
“Ngi shaniah ïa ka tnad kaba dei khmih ïa kane hynrei tang kawei ka dei ban wan pyni ïa ngi naei kita ki trok bad ki jait dohkha aïu ba ki ïoh jingtip ba ka don ka jingkhleh dawai khnang ba ngi ruh ngin lah ban buddien,” la ong u Bah Wankhar.
Na ka liang katei ka kynhun ki nongdie bad ki nongthied dohkha ha katei kajuh ka sngi ki la leit ban ïakynduh ïa ka Commissioner of Food Safety ban ïoh ka jingpynshai halor kane bad hadien ka jingwan ïakynduh, u Bah Wankhar u la ïathuh ba ka Commissioner ka la ong ba ïa ki dohkha kiba wan na ka jylla Assam la shah ban pynïaid ïew namar ba tang ki dohkha kiba don hapoh ka jylla yn nym lah satia ban pyndap ïa ka jingdonkam jong ki paidbah bad ïa ki dohkha kiba wan na kiwei pat ki jylla, yn hap ban peit bniah shwa manla ka 15 sngi hashwa ban pynïaid ïew bad die ïa ki ha ïew khnang ban pynthikna ba kitei ki dohkha kim dei kiba la khleh da ka dawai ‘Formalin’.
“Ngi kyrpad man la ka por na ka liang ka tnad kan wan ban leh ïa ki test khnang ba ma ngi ruh ngin ïoh die da ka jingkylluid mynsiem bad ngin die da ka dohkha kaba khuid kaba suba ka bym don kano kano ka jingktah ïa ka koit ka khiah jong uno uno u nongbam dohkha,” la ong u Bah Wankhar.
Shuh shuh na ka liang kitei ki nongdie dohkha ki la shim ruh ïa ka rai ban die bad pynïaid beit ïa ki dohkha kiba pynmih napoh kane ka jylla bad ki jylla kiba marjan kiba la thikna ba kam shym la don kano kano ka jingkhleh dawai.
