Shillong, Jylliew 09:
Ka Khasi Jaiñtia Christian Leaders Forum (KJCLF) ka la kyrpad ïa ki nongshong shnong ka Manipur ban wanrah biang ïa ka suk ka saiñ hapoh ka Jylla da kaba sangeh noh shi syndon ïa ka jingïakynad bad ka huri-hura.
Ha ka jingïalang ba kyrkieh jong ka KJCLF kaba la long ha ka Sngi Palei, ka kynhun ka la pynpaw ka jingkyndit bad ka jingsngewsih kthang namar ka jingïai bteng ka jingkulmar ha Manipur kaba khlem pyni kano-kano ka dak jingjai-jai.
“Kane ka jingkulmar kaba la shim noh ïa ka jingim jong kiba bun bad kaba la ïalam sha ka jingjulor jong bun tylli ki ïingmane, jingdon-jingem bad jingphetwir jong bun bah ki briew ka donkam ban sangeh noh shi syndon,” la ong ka kyrwoh na u Secretary, KJCLF, Rev. Dr. Edwin H. Kharkongor.
Ka KJCLF ka kyrpad ruh ïa ki nongshong shnong ka Manipur ban sangeh noh ka jingïakynad bad wanrah biang ïa ka shong suk shong shngaiñ.
Ka kynhun ha kajuh ka por, ka pynpaw ïa ka jingïatylli bad baroh ki lanot jong katei ka huri-hura bad khmih lynti ba ka suk ka saiñ kan wanphai biang.
Shuh shuh ka KJCLF ka khot ka wer ïa baroh ki Khristan, Balang bad ki kynhun niam Khristan hapoh ka thaiñ ban pynsngew ïa ka jingsngewkhia jong ki kumjuh ban pyni ïa ka jingïatylli bad ki paid nongshong shnong ka Manipur kiba la shah ktah ha kane ka jingjia ka bym lah pdiang satia.
