Shillong, Jylliew 09:
Ka jingther u ’lap bah ha ka step phyrngab jong ka Sngi Thohdieng mynta ka taïew ha nongbah Shillong ka la pynkmen ïa ki paidbah kiba la ap khmih lynti ban wan noh u slap ban pyntngen ïa ka mariang na ka jingshit kyrpang ka suiñ bneng.
Kane ka jinghap slap kaba la bteng baroh shi sngi ka la ai jingkyrmen ba ka wah Umïam kaba la sdang rngat ha kine khyndiat sngi ba kan dap um biang khnang ba ka lah ban bteng ïa ka sam bording sha ki paidbah ka jylla.
Ha kane ka jingther u slap la sakhi ruh ba ka Wahumkhrah ka la shlei bad ki nala um ki la dap smam.
Ha ka jingbuddien u nongthoh khubor haduh ka por 3:00 baje nohphai sngi katba u slap u dang bteng ban hap, la lap ba ki kali ki hap ïaid napdeng ka um ha thaiñ Polo hajan ka lad ban leit shajan JN Complex bad kumjuh sha Pynthor.
Nangta kaba kham ima ïa ki kali ka dei ha Pynthorbah hajan Langkyrding namar ka jingdap um hapdeng surok bym lait ka nala. Kane ka la pynlong kat haduh ba bun ki kali kin leit phai noh, hynrei ki kali rit kiba nud ban ïaid ka um ka la poi haduh jingkhang ïit.
La ïohi ruh ba kawei ka thuk-thuk kaba kit ïa kawei ka kynthei ka la kyllon hapdeng surok haduh ba kam lah shuh ban ïaid namar ka jingdap ka um.
Wat la kane ka thuk-thuk ka la sahkut hapdeng ka um, hynrei ym don ba lah ban leit ïarap namar ka jingheh ka um bad ka jingther u ’lap bah. Da ka jingïarap ki paramarjan kiba sah harud surok la lah ban ïarap da kaba khynñiat ban lait na katei ka jaka balang um.
Shuh shuh ha ka por mynstep ha ki thaiñ Pynthorumkhrah la ïohi ïa kawei ka kali kaba la sahkut hapdeng surok, hynrei kam lah shuh ban ïaid wat la ka la pyrshang ban ïaid namar ka jingdap ka um hapdeng surok.
Ha kawei pat ka khubor, wat la u slap u la ther ha ka step phyrngab jong ka Sngi Thohdieng bad bteng haduh 4 baje janmiet, hynrei ka um ha Umïam ka kiew tang 2.65 phut. Ha ka 8 tarik Jylliew ka um ha katei ka pung ka don haduh 3162.30 phut, hynrei mynta ka janmiet ha por 5pm ka la kiew da 3164.95 phut.
Kane ka jinghap slap ka la pynkmen ïa ki paidbah kiba la ap khmih lynti ban wan noh u slap ban pyntngen ïa ka mariang na ka jingshit kyrang ka suiñ bneng.
Namar kata, da kane ka jinghap slap kaba la bteng baroh shi sngi ka la ai jingkyrmen ba ka wah Umïam kaba la sdang rngat ba kan dap biang khnang ba kan lah sam bording biang sha ki paidbah ka jylla.
