Shillong, Jylliew 09:
Ka jingpynmih dohkha ka Jylla ha u snem 2022-23 ka long 19,373.925 metrik ton katba ka jingwan poi jong ki dohkha nabar ka Jylla ha une ujuh u snem ka long 15,067.80 metrik ton.
Ïa kane, la ïathuh da ka Director ka tnad ki kam dohkha-dohpnat, Kong A.L. Mawlong haba kren bad u nongthoh khubor ha ka Sngi Thohdieng.
Na katei ka 19,373.925 metrik ton, ka distrik kaba pynmih bun eh ka dohkha ka dei ka West Garo Hills – 5260 metrik ton.
“Katkum ka jingdon briew ha ka Jylla, ngi dei ban pynmih kumba 32,000 metrik ton ka dohkha bad kumta, ka don ka jingduna kaba 13,000 metrik ton,” la ong ka Kong Mawlong.
Ka la ong ruh ba kum shi bynta ban kyntiew ïa ka jingpynmih dohkha bad ka ïoh ka kot jong ki nongri dohkha, ka tnad ka la pyntreikam ïa ka ‘Meghalaya State Aquaculture Mission’ (MSAM) bad ka ‘Pradhan Mantri Matsya Sampada Yojana’ (PMMSY) hapoh ka Jylla.
“Ka jingthmu jong ka PMMSY ka long ban kyntiew ïa ka jingpynmih dohkha hapoh ka Jylla bad ka ïoh ka kot jong ki nongri dohkha. Ha kajuh ka por, ban pynïar ïa ka jaka ban shna ïa ki pung dohkha, ban ïarap pynïeng ïa ki dukan die dohkha nalor kiwei-kiwei,” ka la ong.
Ha kawei ka liang, ka Director ka la ong ba ka thong jong ka MSAM ka long ban pynlong ïa ka Meghalaya ka Jylla kaba lah ban kyrshan hi dalade ïalade ha ka jingpynmih dohkha khnang ba nym phai khmat shuh ne shaniah ha ka dohkha kaba wan nabar Jylla.
“Ka MSAM kan ïarap kyntiew ruh ïa ki nongri dohkha, ban pynneh ïa ki doh-um lyngba ki ‘Fish Sanctuary’ bad kiwei-kiwei,” ka la ong.
Ka la ïathuh ruh ba ha ka kylla banyngkong jong ka MSAM, ki nongri dohkha kiba la ïoh jingmyntoi ki don 21,071 ngut, katba ka MSAM-2.0 ka dang ïaid mynta wat hapdeng ka jingpynthut jong ka khlam COVID-19 ha kine ki khyndiat snem ba la dep.
Haba ai mynsiem ïa ki nongri dohkha ban shimkhia ïa ka kam, ka Kong Mawlong ka la ong, “Lada baroh ki nongrep hi ki kitkhia, kata ka dohkha hapoh ka Jylla kan shlei bad ha kata ka por, ngi lah ruh ban shalan shabar.”
Ka la ong ruh ba ka distrik hapoh ka Jylla ka bym donkam shuh ban pynpoi dohkha na shabar ka dei ka South West Garo Hills namar ka la lah ba kyrshan hi dalade ïalade ban pyndap dohkha hapoh ka distrik.
Halor ka hukum ban khang ïa ka jingwanrah dohkha nabar ka Jylla hadien ba la shem ba ka don ka jingpyndonkam kaba jur ïa ka dawai ‘Formalin’ ha ki dohkha, ka tnad jong ka East Khasi Hills ka la bthah ïa ki nongtrei ba peit ha ki Block ban pyntip sha ka tnad halor ki pung kiba la long ban tong ïa ki dohkha khnang ba lah ban pynpoi pat ïa ki sha ïew.
Shuh shuh ka Kong Mawlong ka la bynrap ba ka dohkha kaba pynmih na ka Jylla kaba la die ha ka por ba khang pynpoi dohkha na shabar Jylla namar ka katei kajuh ka daw ha ki 5 snem ba la dep ka long 50,399 kilo.
