Saphriang ba don ki nongdie ïa ki jingbam thiang ba khleh bad u drok sha ki khynnah skul

Shuh shuh katei ka jingthoh ka la ïathuh ba kitei ki briew kiba leh ïa katei ka kam ki la ïaid ha ki katto katne tylli ki thaiñ kiba don ïa ki skul. 

Shillong, Jylliew 09:

Ka la don ka jingsaphriang jong ki dur bad ki jingthoh ha ki rynsan ‘Social Media’ ba ki don ki briew kiba die ïa ki jingbam thiang kiba la khleh lang bad u drok sha ki dukan khamtam sha ki thaiñ ba don ki skul bad ka la don ruh ka jingsam ei ïa kitei ki jingbam thiang sha ki khynnah skul ha kaba ki la don ruh kiba ngat ha kane ka shrip.

Katkum katei ka jingthoh kaba la saphriang ka la ïathuh ba ki khynnah hadien ba ki la dep ban bam ïa kitei ki jingbam thiang, ki kylla pher bad ka la pynlong ïa ki ba kin dang kwah shuh shuh ban bam ïa kitei ki jingbam thiang.

Shuh shuh katei ka jingthoh ka la ïathuh ba kitei ki briew kiba leh ïa katei ka kam ki la ïaid ha ki katto katne tylli ki thaiñ kiba don ïa ki skul. 

Nalorkata, ka khubor ka la ïathuh ba kitei ki briew ki la thap tang ïa ki khynnah skul ban ai ïa kitei ki jingbam thiang ha kaba kitei ki briew ki la ong ruh ïa ki khynnah skul ba ki aiei ïa utei u jingbam thiang ban mad namar ba ki dang sdang pyrshang ban shna bad pynmih thymmai.

Halor kane ka jingsaphriang jong katei ka jingthoh, na ka liang U Nongsaiñ Hima u la wad jingtip na ka tnad pulit, bad ka tyllong khubor na ki pulit ka la ïathuh ba ka dang pyrshang ban pynthikna la katei ka jingthoh ka dei kaba shisha ne ka bym dei.

Shuh shuh la ïathuh ba ki pulit ki la dep ban ïoh ïa kaba kum katei ka jingthoh ha ryngkat bad ki dur kiba la saphriang jong ki briew ïa kiba la kynnoh ba ki la donkti ha ka jingdie ïa kita ki jingbam thiang. Hynrei ki pulit ki la ong ba kin sa wad bniah shuh shuh halor kane bad ïa ki briew kiba la paw ha kitei ki dur kiba la saphriang.

Nalorkata, ki pulit ki la ong ba kam tip la kitei ki briew kiba la shah bat kumba la paw ha ki dur ki dei kiba la shah bat mynshwa ne kiba dang shah bat mynta.