Shillong, Jylliew 09:
U Myntri ka Sorkar Jylla, Bah Paul Lyngdoh, uba peit ïa ka tnat Social Welfare u la thalaiñ ïa ka Kong Patricia Mukhim halor ka jingkynnoh ïa u bad ïa ka United Democratic Party (UDP) haba ïadei bad ka jingtohkit ïa u khaw uba dei jong ka Jylla ha kaba la kynnoh ba la thmu ban pynpoi sha Assam.
Kum ban pynkynmaw, ïa ka jingtohkit la khlieh da u nongbishar uba la shongthait, u MC Garg ban tohkit halor ka jingkynnoh ba u khaw bad jingbam (SNP) kiba hap hapoh ka Integrated Child Development Scheme (ICDS) u la jah noh shiteng lynti ha Assam.
Haba pynshai ïa ka jingkynnoh ka Kong Patricia ha ka jingthoh jong ka, u Bah Paul u la ong ba ma u kum u Myntri u la dep pule ïa ka kaiphod jingtohkit kaba la thoh shai ba ym don kano kano ka jingleh thok. Hynrei ka Kong Patricia pat ka la kynthoh ba u Bah Paul u pyrshang ban ïada ïa u Myntri Sorkar barim u Bah Kyrmen Shylla uba peit teng mynshwa ïa ka tnat Social Welfare.
U Bah Paul u la ong ba ka Kong Patricia ka nud ruh wat ban ong ba ka UDP ka ïoh myntoi na kane ka jingkynnoh bamsap.
U Bah Paul uba la pule ruh ïa ki jinglap jingshem jong ka kynhun tohkit, u la ong ba ka kynhun tohkit ka khlem lap sabut satia ba ïa u khaw la thmu ban pynphai shawei pat.
Kumta u la ong ba haba u kren shaphang kane ka jingtohkit u kren katkum kaei kaba la lap da ka kynhun tohkit, katba ka Kong Patricia ka kynthoh khlem nongrim da kaba khlem pule ïa ka.
Haba kylli la u dawa ban panmap na ka Kong Patricia, u Bah Paul u la ong balei pat ka Kong Patricia kam leit mih hakhmat ka kynhun tohkit ban ïathuh ïa ki jinglap jong ka.
U la ong ba ka kynhun tohkit ka la dep kylli na kumba 200 ngut ki nongïoh myntoi kynthup ruh na ki lai ngut ki briew kiba kynthup ïa u Tarun Bhartia, Kong Angela Rangad bad Kong Agnes Kharshiing, hynrei kine ruh ki la jah pynban khlem wan shuh ban ai jingbatai.
“Ka jingkynnoh ka Kong Patricia ïa nga ka long ban pynjah burom bad jingthmu ban pynsniew ïa ki nongïalam kiba la jied da ki paidbah,” la ong u Bah Paul.
U la ong ba ka kynhun tohkit ka la kren shai ruh ba kam ïoh ka jingïatreilang na ki pulit Assam kiba dei ki nong kurup ïa uta u khaw.
Nalor kata, u la ong ba ïa kane ka kaiphod la peit bniah da ka tnat aiñ, bad la pule ruh da Advocate General ka Jylla, hynrei ka Kong Patricia ka bym pule ïa ka kaiphod ka la shu kynnoh khlem nongrim.
