Ka dohkha kaba na ka Jylla & Assam ka long kaba shngaiñ: Nongdie Dohkha

“Kine ki dohkha ki dei beit tang kiba na Shillong bad na Assam namar nangthie ki tong mynstep bad janmiet ki poi,” u la ong.

Shillong, Jylliew 11:

Ki nongdie dohkha ha ka Sngi Saitjaiñ ki la pynsngew ba ka Commissioner of Food Safety, kaba long ruh ka Deputy Commissioner ka East Khasi Hills, Kong R.M. Kurbah ka la ai jingbit ïa ki ban die ïa ki dohkha kiba napoh ka Jylla bad na Assam na bynta ka jingshngaiñ jong ki paidbah nongthied dohkha.

Ki nongdie dohkha ha Ïewduh ki la ïathuh ba katei ka jingai jingbit ka la wan hadien jong ka jingïakren hapdeng jong ki bad ka DC ha ka Sngi Thohdieng. Ki la ong ruh ba kitei ki dohkha ba la ïoh jingbit ban die kim ktah ïa ka koit ka khiah.

Ha kawei ka liang, la shem ba ka basa dohkha ha Ïewduh ha ka Sngi Saitjaiñ ka dang kynjah ha ryngkat ka jingduna jong ki nongthied-nongpet namar kiba bun ki dei kiba die ïa ki dohkha ba wan poi nabar.

“Kane ka ’kha ‘local’ kam don nawei-nawei, hynrei ka dei beit kaba na Assam kum na Barpeta, Morigaon, Nagaon, Jagiroad bad ym don tam ba kin wan na kiwei-kiwei ki jaka,” la ong uwei na ki nongdie.

U la ong ruh ba ki nongshong ïew mynta ki ap beit ïa ka mar ka ban poi kham hadien wat la kam dei kaba pahuh, hynrei kaba kin ïoh ban ïa die lang malu-mala.

“Katkum ka jingtip ba ïoh na ka DC haba ïadei bad ka dohkha ‘local’, ka la ong ba la dep ban peit bniah bad la pyntikna ba ka long kaba shngaiñ na bynta ban bam ki paidbah,” u la ong.

Ha kajuh ka por, u la kyntu ïa ki paidbah ba kin ym khohñioh mynsiem ban bam ïa kane ka dohkha (local) kaba na ka Jylla (’kha-rit, ’kha-bah) namar ka long kaba shngaiñ bad kaba la dep pyntikna da ka DC.

Ha kawei ka liang, uwei pat u nongdie uba die ïa ki ’kha-rit kiba wan poi na Bhoi, u la ong ba ka ïew dohkha ka kynjah bad kam long kumba long barabor naba ki briew ki la kiar ban wan thied ïa ki dohkha.

“Ka la ktah bha. Ka ’kha ‘local’ na Assam…ki tong mynstep bad ka wan poi shane janmiet. Lada ym ïoh na Assam, nangno keiñ ngin ïoh na shane. Kaba bun hi ka wan na Assam…na Bhoi ruh ka don tangba ka duna,” u la ong.

Haba kylli, uwei pat u nongdie u la ïathuh ba ka dor jong ka ’kha ‘local’ ka la kiew, bad naduh ba shah khang, um shym la buh shuh ïa ki dohkha ba wan na shabar.

“Kine ki dohkha ki dei beit tang kiba na Shillong bad na Assam namar nangthie ki tong mynstep bad janmiet ki poi,” u la ong.

Kum ban shu kdew hangne, sa shisien pat hapoh san snem, ka Meghalaya ka la pynmih hukum ban khang ïa ka jingwanrah dohkha nabar ka jylla hadien ba na ka jingpeit bniah ïa ki dohkha na kylleng ki distrik ka Jylla la shem ba ka don ka jingpyndonkam kaba jur ïa ka dawai ‘Formalin’ ha ki dohkha kaba long kum ka bih bad kaba ktah jur ïa ka jingkoit jingkhiah.