Shillong, Jymmang 27
U Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar jong u ka la pynsangeh lut ïa baroh ki jingtyrwa bathymmai haba ïadei bad ki jingleit bar-ri bad u la pynsangeh ruh ïa la ka jong ka jingleit bar-ri kaba ïahap bad ka jingpynbna ba dang shen jong u Myntri Rangbahduh ka ri, u Narendra Modi ban pynduna ïa ka jingpynlut pisa.
Haba kren shaphang ki jingsngewkhia halor ki jingleit bar-ri kiba dang bteng wat hapdeng ka jingkyrpad jong u Myntri Rangbahduh, u Conrad u la pynshai ba tang ki prokram ba la mynjur ha ki bnai ba hashuwa bad ba la ai jingmynjur da ka Sorkar Pdeng la shah ban ïaid shakhmat.
“Ki prokram kiba la ïoh ïa ka jingmynjur ha ka liang ka saiñ pyrthei kumjuh ha ka liang ka pisa-tyngka hashuwa jong ka jingpynbna u Myntri Rangbahduh, ki la ïaid shakhmat, namarba kum kine ki jingleit-jingwan, ki shim por lai haduh saw bnai eiei, teng-teng hynriew bnai ban pynkhreh,” u la ong ha ki nongthoh khubor.
U la ong ruh ba ki kynhun kiba don mynta shabar-ri ki la leit hadien ba la pyndep lut ïa baroh ki jingdonkam.
“Kine ki dei kiba la don lypa ha ka jingpynkhreh. Ïa ka jingpynïaid kam la dep leh, la dep ruh ban leh ïa ki ‘Booking’, la dep ban mang ïa ka jingpynlut, bad ka Sorkar Pdeng ka la ai jingbit ruh ha ka liang ka saiñ pyrthei,” la ong u Conrad.
Hynrei naduh ka jingpynbna jong u Myntri Rangbahduh ka ri, ka Jylla kam shym la mynjur shuh ïa kino-kino ki jingkyrpad kiba thymmai.
“Hadien ka jingpynbna jong u Myntri Rangbahduh, kino-kino ki jingtyrwa thymmai na ka bynta ki jingleit shabar ym shym la pdiang,” u la ong.
U Conrad u la kdew ba u la shim ïa ka nongrim kaba skhem halor katei ka mat watla kam shym la don ka jingpynbna kaba pura.
“Nga la pynsangeh hi dalade ïa man la kawei-pa-kawei ka jingleit bar-ri. Nga la kren shai bha ba ngi la hap ban ïaid katkum ka jingbthah jong u Myntri Rangbahduh namarba kane ka dei na ka bynta ka jingmyntoi kaba kham heh jong ka ri,” u la ong.
“Nga la pynsangeh lut ïa baroh ki jingleit bar-ri hadien ka jingpynbna jong u Myntri Rangbahduh,” ong u Conrad.
U la bynrap ba ïa ki jingleit bar-ri kiba la mynjur kham hashuwa la shah tang namarba la dep pyndep ïa ka jingpynkhreh kam.
“Kiba hashuwa kata la dep ban mynjur, kumta, kita ki la ïaid shakhmat. Hynrei hadien ka jingpynbna jong u, ïa kano-kano ka jingtyrwa kaba thymmai na ka bynta kano-kano ka jingleit bar-ri la pynsangeh noh shuwa,” u la ong.
Haba batai bniah ïa ki jingpynkhreh na ka bynta ki jingleit bar-ri kiba kham hashuwa, u Conrad u la ong ba ki la sdang shuwa ka jingbthah jong u Myntri Rangbahduh.
“La pynkhreh ïa kine ha kine ki lai bnai ba la dep, san bnai hashuwa ka jingpynbna u Myntri Rangbahduh. La pyndep ïa ki ‘Booking’, la shim ïa ki jingbit ha ka liang ka saiñ pyrthei na ka Sorkar India, bad la pynbeit ïa ki jingdonkam bad ki Sorkar kiba dei khmih,” u la ong.
“Hadien ba u la mih shakhmat bad ka jingpynbna bad jingkyrpad ïa ki Jylla ba kim dei ban phah ïa ki kynhun, ngim shym la ai jingmynjur ïano-ïano ruh. Nga la ïoh haduh kumba 7-8 tylli ki jingtyrwa thymmai bad ïa baroh la pynsangeh noh shuwa,” la ong u Myntri Rangbah.
