Shillong, Jymmang 27
Ka kynhun jong ki nongtrei jong ka tnad Transport ha ryngkat ki pulit Enforcement Inspector ha ka 27 tarik u Jymmang ki la hiar sha Motphran ban beh krad ïa kiba kamai arshaka da kaba kdew ba ka dei ka jingkamai be-aiñ.
Ki pulit Enforcement jong ka tnad ki la bat ïa ki arshaka ba kit briew ban kamai bad daiñ kuna, kumjuh ruh ban bthah ïa ki ba kin leit mih ha ophis u District Transport Officer (DTO) ban ïakren ïa pynbeit ïa kane ka kam.
Hapdeng ka jingtalasi ki pulit, la wan poi ki nongïalam ba hakhmat jong ki nongñiah arshaka ha kaba ki la pynpaw ïa ka jingpyrshah ïa ka jingshah khang ban kamai bad ka la mih ka jingïania hapdeng ki nongïalam bad ki pulit jong ka tnad.
Haba ïakren ïa u nongïalam ka kynhun “Ride to Serve Shillong” u Bah Kyntiewdor Nongkynrih u la ïathuh ba ka jingmih kine ki kynrum-kynram ha kine ki sngi ka la pynkynduh jingeh shibun ïa ki, Namarkata u la pynpaw ba na ka liang jongki ki la dep ban buh jingthoh sha ka Sorkar lyngba ka tnad Transport ban dawa ba ka tnad ka dei ban ai da ka hok ban kamai ïa ki arshaka (individual permits) bad kyntait ban leit pynïasoh sha ki kompeni lane ïa ki ‘Aggregator’.
U la pynpaw ba ka kynhun naduh u snem 2023 ki la phah da ka jingthoh sha ka Sorkar halor kine ki jingdawa jong ki hynrei ka Sorkar kam shym la jubab eiei halor kane katba ka ai pynban da ka Meghalaya Rental Motor Scheme kaba dei na ka bynta ki briew kiba pynïaid ha kaba khaïi.
U la pynpaw ka jingsngewkhia haba ïadei ba ka Sorkar ka ju pynshlur ban trei ki kam lajong katba haba ki pan ïa ka rukom kamai kaba shong aiñ ka Sorkar kam leh eiei, “Ha ka jingshisha ka Sorkar ka dei ban ïarap namar ngi pan ïa kaba dei bad ka Sorkar ruh kan ïoh jingmyntoi lada ka ai ïa ka jingbit ïa ngi ban kamai da kaba shong hok kumjuh ka ban dei katkum ki kyndon ka aiñ,” u la ong.
