Ym don jingïashrut hapoh ka NPP halor ka ilekshon MP Rajya Sabha

Shillong, Jymmang 27

U Myntri Rangbah ka Jylla Conrad K Sangma ha ka Sngi Balang u la kyntait ïa ka jingkynnoh u President ka Congress Bah Vincent H Pala ba ka National People’s Party (NPP) kan sa mad ïa ka jingïashrut hapoh ïing na ka ilekshon Rajya Sabha bad pynpaw ba ka seng jong u kan shim ïa ka rai da ka jingsngap ïa ka sur uba bun balang haba bthah ïa u Bah Pala ba u dei “Ban peit shwa ïa ka jingïapait ïapra hapoh ka Congress”.

U Conrad uba dei ruh u National President ka NPP u la ong ba ka NPP kam treikam satia lyngba ki jingbthah bad hukum jong kiba najrong.

“Ha kaba ïadei bad ka National People’s Party, ngi long kiba ïaid ha ka lynti synshar paidbah ha ka rukom treikam,” u la ong bad bynrap “Kam don kano kano ka bynta jong ka high command ban shu wan bad ban leh donbor ïa ka rai”.          

U la kdew ba ka jingïatai hapoh ka seng ka long ka mat pdeng eh jong ka rukom treikam ka seng. “Ha kiba bun ki mat bad ki jingjia kiba don, ka ju don beit ka jingmih kaba long ha ka rukom kaba biang bad kaba bha, ki jingïatai kiba tei kiba ju ïai mih hashwa ban shim ïa kano-kano ka rai kaba khatduh,” la ong u Conrad.

“Hooid, ha kata ka jingïalang, ngin kren beit baroh ïa kaei kaba ngi kwah ban kren watla ka dei kaba mut kaba nga ngam lah ban pdiang ruh. Kane ka dei ka rukom treikam jong ka synshar paidbah bad ka dei ruh ka nongrim ïa kaba ngi kum ka seng bad wat ha ka Sorkar ngi ïaid shakhmat,” u la bynrap.

Haba kren beit ïa u Bah Pala, u Conrad u la ong, “Ai ngan pynthikna ïa u Bah Pala ba um donkam ban khuslai eiei ïa kano-kano ka jingorpait ha ka NPP. U dei ban peit kham bun ïa ka jingorpait hapoh jong ka Congress.”

U la ong, ba ki jingpynsngew kiba bun jait ki dei kiba la khmih lynti ban mih beit hapoh ka NPP hynrei ka rai kaba khatduh kan dei beit pat da kaba buh hakhmat ïa ka Jylla. “Ngi don hangne ban ïatreilang hynrei hooid ngi don pat ïa la ki jong ki jingpynsngew bad kata ka long kumba ju long ïa uno uno u riewshimet”, ong u Conrad bad bynrap, “Ha kaba kut hi ka sngi, ngin leh ïa kaei-kaei kaba bha tam jong ka seng bad kaba kham kongsan eh na ka bynta ka bha ka miat jong ka Jylla”.

Halor ka ilekshon sha Rajya Sabha, u la ong, ka seng kan sa bud da kajuh ka lynti jong ka jingïasyllok. “Da kaba buh ha ki jingmut jingpyrkhat ïa ka ilekshon Rajya Sabha, ngi long kiba shai kdar ba kan dei da ka lynti katkum ka mon jong kiba bun balang” la ong u Conrad.

“Baroh ki MLA ka seng, ki ban long ki nongthep vote kiba kongsan, kin sa ïa shong ban ïakren bad shim rai kumno ban ïaid shakhmat,” u la ong.