Shillong, Jymmang 27
Ka United Democratic Party (UDP) kan sa pynbna noh ïa u kyrtong u ban ïakhun ïa ka ilekshon MP Lok Sabha shiteng samoi lashai ka sngi Palei.
Ka UDP kan sa shong ïa ka General Executive Committee lashai ka sngi ha ka por mynstep hadien kata kan sa pynbna ïa la u kyrtong.
Katkum ki khubor la ïathuh ba ki don kumba lai ngut ki riew rangbah kiba la tyrwa ïalade sha ka UDP hynrei ka UDP kan sa shong pyrkhat lashai ban pynbna noh khnang ba ki nongkyrshan ka UDP kiba don ha ki shnong kin tip noh ban suk haba kin leit ban pynsngewthuh sha ki paidbah.
Ka UDP kaba don 12 ngut ki MLA kan dei ka seng saiñpyrthei kaba saw ban pynbna noh ïa u kyrtong sha ka ilekshon MP Lok Sabha namar ka seng kaba pynbna nyngkong ïa u kyrtong ka dei ka VPP kaba la pynbna ïa u Dr. Batskhem Myrboh, nangta bud sa ka NPP kaba la pynbna ïa u Dr. DRL Nonglait, ka Congress ka la pynïeng biang ïa u Bah Vincent H Pala uba dei u MP barim.
Watla ka UDP ka ju ïatreilang bad ka HSPDP ha kata ka Regional Democratic Alliance hynrei ki khubor ki ïathuh ba ka UDP ka khlem pat pyntip ïa ka HSPDP ban pynbna ïa u kyrtong, hynrei ki khubor kiba shai kan long lashai ka sngi ynda ki la pynbna ïa u kyrtong.
