Shillong, Jymmang 27
U Myntri Rangbah ka Jylla Conrad K Sangma u la ong ba um pat kwah kren eiei halor ka nongrim jong u haba ïadei bad ka Uniform Civil Code (UCC) tad hadien ka jingïohi ïa ka draft kaba shisha, watla u la kubur ba u “don ka jingsngew shngaiñ khyndiat” haba ïohi ba ka aiñ UCC ha Uttarakhand bad Assam kim shym la ktah ïa ki aiñ ki paid riewlum.
“Nga la kren shai bha halor ka UCC halor kawei ka nongrim bad kata ka nongrim ka long ba ngam pat lah ban kren eiei halor ka UCC lada ngam pat ïohi ïa ka draft jong ka UCC”, ong u Conrad haba kren sha ki nongthoh khubor ha ka sngi Balang.
U la batai ba tang ka kyrteng ruh ka long ka bym shai, ka jingmut ba ngan kynthoh ïa ka. “UCC ka dei ka Universal Civil Code. Kaei kaba kata ka UCC ka mut bad kiei kita ki aiñ ki ban long ryntih lang, kane ka dei kaba nga kwah ban ïohi”, u la ong.
U Conrad u la ong ba ka jingpyrshah jong u haba nyngkong ka mih na ka jingsheptieng halor ka riti ka dustur jong ki riewlum. “Haba sdang haba ngi khmih ïa ka UCC, ka dei ka kam kaba hap pyrkhat. Haba ki briew ki kylli ïa nga halor ka UCC ha katei ka por, nga ong em, ngim lah ban don ïa ka UCC namar ngi dei ki riewlum bad ki aiñ riewlum jong ngi ki ïapher”, u la ong.
Hynrei, u pynpaw ba ka jingsngew kala kylla hadien ka jingbishar ïa ki aiñ jong kiwei ki Jylla ba dang shen. “Mynta ngi la ïohi ïa ka dur jong ka bad kumno ka UCC ka wan ha ki Jylla bapher-bapher. Nga kham sngew shngaiñ mynta namar lada phi khmih ïa ka UCC ha Uttarakhand lane la ka long ha Assam, kim shym la ktah ïa ki aiñ ki riewlum”, ong u Conrad.
“Kynsan kynsan mynta ka UCC kala wan na Assam bad Uttarakhand bad kila kdew shai hangne ba la pynlait noh ïa ki aiñ ki riewlum, kumta kiei-kiei baroh kila pher”, ong u Conrad haba bynrap “Hynrei ka Meghalaya hi kan dang hap ban pule bniah ïa kano-kano ka jingtyrwa”.
U Conrad u la ong ba ka jingkhuslai ba jur eh na ka bynta ka Jylla ka dei ka jinglah ban ktah ïa ka rukom ai jait sha ka Kmie. “Ngi don ka jingkhuslai ba ka rukom ai jait kmie jong ngi ka lah ban shah pynkylla noh bad ka aiñ ka ri kan wan bad pynkylla lut ïa ka rukom jong ki riewlum ka Jylla jong ngi ban ai jait sha ka Kmie”, ong u Conrad.
