Shillong, Jylliew 11:
Ka sorkar Meghalaya lyngba ka tnat General Administration Department (GAD) ka la pyntip ba ka jylla ka wan sha trai haba ïanujor ba kiwei ki Ri ha ka jingpynrung kyrteng jong ki nongshong shnong na ka bynta u Aadhaar. Kane ka lah ban wanrah ïa ka jingshah pynduh noh ïa kiba bun ki skhim ka Sorkar Pdeng lada ki paidbah kiba ïoh jingmyntoi kim don Aadhaar.
Kawei ka bynta ka ban kham shah ktah jur na ka daw jong ka jingduna kiba pynrung kyrteng ban ïoh Aadhaar ka dei ka jingsam ïa ki jingbam sha ki khyllung khynnah lane ka Supplementary Nutrition Programme (SNP) ba ju sam ha ki ïing Anganwadi.
Ka Sorkar Pdeng ka la pyntip sha ki sorkar jylla ba ka jingpyllait pisa hapoh katei ka SNP kan long noh tang sha kito ki paidbah kiba la don Aadhaar.
Namarkata, ka sorkar jylla ka la pynlong da ki prokram kyrpang ha kylleng ban pynshlur ïa ki nongshong shnong ba kin wan shakhmat ban pynrung kyrteng bad ban ïoh ïa u nombor Aadhaar.
Ïa kine ki prokram la leh khamtam ban pynrung kyrteng ïa ki khyllung ba dang shu kha, ki khyllung khynnah, kynthei bad longkmie bad baroh kito kiba ju ïoh ïa ki skhim kum ka SNP, MHIS, NFSA, Stipend/Scholarship, PM-KISAN, Mid-Day Meal Scheme bad kiwei.
Ka sorkar ka la buh ïa ki shlem pynrung kyrteng Aadhaar ha baroh ki jaka treikam jong ki Deputy Commissioner, Sub-Division, bad BDO. Ha kine ki shlem, lah ruh ban pynkylla lada don jingbakla ha ka kyrteng ne kiwei pat ha ki Aadhaar ba la ïoh teng.
Shuh shuh ka sorkar jylla ka la kyntu ïa ki paidbah ba na ka daw jong ka jingdon ban ïoh ïa u OTP (One-Time Password) ha ki Mobile Phone, kito kiba la pynkylla ïa ki nombor phone ba la pynïasoh bad u Aadhaar, ki dei ban leit pyntip sha kitei ki shlem ba la kdew haneng khnang ban lah pynthymmai pat.
Ha kajuh ka por, ka sorkar Meghalaya ka la kyntu ïa ki nongshong shnong ki bym pat don ïa u Aadhaar nombor ba kin leit noh mar-mar ban pynrung kyrteng.
Katkum ki jingkheiñ jingdiah na ka UIDAI (Unique Identification Authority of India), ka jingdon ki nongshong shnong ha Meghalaya ka long kumba 33,49,000. Napdeng kine kiba la don Aadhaar ki long 23,04,621 lane 68.82 na ka 100. Kine ki jingkheiñ ki dei kiba haduh ka 31 tarik Lber, 2023.
