Nongstoiñ, Jylliew 11:
Da ki spah ngut ki paidbah nongshong shnong jong ka Rambrai konstitwensi ha ka Sngi Saitjaiñ ki la pynpaw ïa ka jinglong ba la kloi ban pynïasoh sha ka Voice of the People Party (VPP) ha ka jingïalang kaba la pynlong ha Mount Calvary Parish, Rambrai.
Ka jingthrang jong ki paidbah ka Rambrai ban ïasoh sha ka VPP la sakhi ruh lyngba ka jinglong ba la kloi ka jong ki ban ïeng na ki jaka shong bad rah la ki kti hadien ba u President rangbah ka seng, u Bah Ardent Miller Basaïawmoit uba long ruh u MLA ka Nongkrem haba kut ka jingkren u la buh jingkylli ba lada ki paidbah ki la rai ban wan ban ïasoh bad sha ka seng, kata kin sngewbha ban ïeng bad pynpaw da kaba rah ïa ki kti khlem ka jingpynbor ïano-ïano.
U Bah Basaïawmoit u la ong ba ka jingïalang kaba la long ka dei ka jingïalang ban pynsngewthuh bad pynshai ïa ki nongrim jong ka VPP bad ka jingpynrung dkhot sha ka seng.
“Hooid, ngi sngewthuh ba ka don ka jingangnud bad ka jingthrang jong ki paidbah ban pynïasoh bad ka VPP lane ka seng ‘Prah’. Lada ngi shuh sngap ïa ka sur jong u paidbah lehse ngin shu phah beit kumto ban rung dkhot hynrei ngi da wan da ka seng – ki nongïalam ba hakhlieh duh kaba ngi da kwah ban da sngewthuh shai balei ba phi rai ban ïasoh bad kane ka seng,” la ong u President.
U la ong ruh ba kam dei ba long kum ha ki por ba mynshuwa ba tang namarba sawa ka lyer jong ka kti, yn leit Congress lut baroh, sawa ka lyer ka UDP, ïa leit UDP lut baroh bad kumta ter-ter. Hynrei ka VPP ka da kwah ban sngewthuh ïa ka nongrim bad haba sngewthuh ïa ka nongrim ym don shuh mano-mano ba lah ban pynkhih. Dei namar kata ka daw ka seng ka wan ban ïakynduh ïa ki paidbah ban pynshai balei ka VPP ka la mih.
“Ngi sngewthuh ha ka saiñ pyrthei kin don shibun kiba pynsngewthuh bakla namar mynta lei ka dang don palat kata ka jingtieng ïa ka VPP kaba shu mih bun ki jingkynthoh bad kiba kynthoh hi ka long ba ym dei ba ngi bakla ma ngi, ka dei ka jingtieng palat ïa ka VPP. Ki dkhot jong kiwei ki seng ki duh thiah duh dem namar ki tieng ba lehse ïoh ha kawei ka sngi ka VPP kan khlaiñ. Kumta ka dei ka kamram jong ki na ka bynta ka seng jong ki ba kin pynsngewthuh bakla ïa ki paidbah.”
Shuh shuh u la bynrap ba haba rung sha ka VPP dei ban shai ka jingmut jingpyrkhat balei ba rung sha ka seng naba ka seng kam kwah ban shu long tang kata ka jingbeh jong ka lyer hynrei ka dei ban long namar ka jingsngewthuh jong ka jingmut jingpyrkhat khnang ban nang lah ban trei kham bha nangne shakhmat.
Ha katei ka sngi nalor u Bah Basaïawmoit, la don lang ruh u MLA ka North-Shillong, u Bah Adelbert Nongrum lem bad kiwei-kiwei.
