Shillong, Nailur 08
Ki nongshong shnong ka Elaka Nongkhlieh hapoh ka jingsynranlang ka Khasi Students’ Union (KSU) East Jaiñtia Hills ha ka 08 tarik u Nailur 2026, ki la leit ban buh da ka jingujor sha ka ophis Crime Branch Police Station, Shillong, ban dawa kem mardor ïa kiba donkti ban pynmih jingkulmar myn ha ka 31 tarik Naitung 2026, ha ka por ba pynlong ïa ka Public Hearing.
Haba kren sha ki lad pathai khubor ki longkmie nongshong shnong ka Elaka Nongkhlieh ki la pynpaw ka jingbitar, ba ka Sorkar ka leh shiliang ba haduh mynta la ïaid 2 bnai khlem pat kem ïa ki briew ba pynmih jingkulmar bad kiba tih ïa ka surok PWD.
Ki la ong ruh, ba por ba pynlong rally ka KSU, ka Sorkar ka la kloi ban kem ïa ki nongïalam, hynrei ïa kiba donkti ban pynmih jingkulmar ha ka ‘Public Hearing’ bad kiba tih ïa ka surok pat, kim shym la pat kem da kaba kynnoh ba ka Sorkar ka leh shiliang khmat.
Nalorkata, ki la ïathuh ruh ba ki pulit wat ïa ki kynthei ruh kim shym la map shuh bad ki thmu kawang beit da ki bom pynsat khmat, ha ka por ba ki thmu leit sha ka ‘Public Hearing’, hynrei ha kata ka por la ïoh bat noh kawei ka kynthei ïa u bom pynsat khmat.
“Ngim sngew lah shah shuh, ngi kiba mad ngi sngewthuh ïa ka jingthar u shiah. Haduh mynta ym pat kem ka Sorkar ïa ki briew ba donkti ban tih ïa ka surok, kumta ngim banse ban wan ai da ka jingujor,” la ong ki longkmie.
“Haba ka Sorkar ka thaw ïa kata ka ‘Fact Finding Committee’, hynrei ngi ki nongshong shnong ngi tieng ba ïoh kane ka jingtohkit kan shu kut tang ha ka jaka shong. Ngi kwah ba ka Sorkar kan wan tohkit ha ki jaka jong ngi, khmatam ha Lum Syrman, khnang ban lap ba ki jaka ha Elaka Nongkhlieh, kidei shibun ki jaka rem,” ki la bynrap.
