Shillong, Nailur 08
U nongaibuit barim bad uba dei u nongseng ïa ka UDP Bah Bindo M Lanong u la rwai ïa kawei ka jingrwai kaba ong, “la pluh ka lieng ki nongïapom la sah satang Bah Metbah ha UDP.”
Haba u nonglum khubor u la ïakren bad u Bah Bindo halor ki khubor ba la mih ha kine ki sngi ba ki don ki 9 ngut ki MLA ka UDP ki thmu ban mih noh ban leit pynïasoh sha ka BJP bad 2 ngut kin leit pynïasoh sha ka NPP, u Bah Bindo hashwa ba un ai jingkren u la rwai ïa kawei ka jingrwai kaba ong, la pluh ka lieng ki nongïapom la sah satang Bah Metbah ha UDP.
U Bah Bindo u la ong ba ka jingthmu ki MLA ka UDP ban mih noh ka dei namar ka jingtlot u Bah Metbah Lyngdoh kum u President.
U la kynnoh ba u Bah Metbah um don jingkitkhlieh ïa ka UDP hynrei u kham don jingkitkhlieh ïa ka kam lajong ba u ju trei man ka sngi.
“Nga dei u nongseng ïa ka UDP bad haduh ban da long President u Dr.Donkupar Roy (bam kwai ha dwar u Blei), nga la long MDC naduh u snem 1972 haduh 6 sien kynthih kynthup kum u nominated MDC bad 2 sien kum u MLA” u la ong.
Shuh shuh u la ong ba u nongïalam ka UDP um dei ban shakri ar kynrad donkam ban shakri beit tang kawei ka kam.
U la ong ba kane ka jingjia ba thmu ban mih ki MLA ka UDP ka dei namar ka jingbym don jingkitkhlieh u President.
Shuh shuh u la pynkynmaw haba u leit ban pynkhreh ban ïakhun ïa ka ilekshon MLA ha u snem 2023 na Nongkrem constituency u la shah pynduh tiket bad ai ïa u Bah Lambor Malngiang u bym dei u dkhot ka UDP.
“Ngam kynnoh ïa u Bah Lambor namar um dei u dkhot ka UDP haba u shah rem u la mih noh hynrei nga kynnoh beit ïa u President uba la pynduh tiket ïa nga” u la ong.
Kumban shu pynkynmaw ba ha kine ki sngi hadien ba ki khubor na Jylla bad jong ka ri ki la pynmih ba khyndai ngut ki MLA ka UDP kin rung noh sha ka BJP bad ar ngut kata u Bah Nujorki Sungoh uba la jop arsien na ka UDP bad u Bah Renikton Lyngdoh na Mawkyrwat kin rung sha ka NPP, kaba sah mynta ha ka UDP satang u Bah Metbah Lyngdoh u MLA ka Mairang Constituency uba dei ruh u President ka UDP.
Kine ki khyndai ngut ki MLA ka UDP kiba thmu ban rung sha ka BJP ki long u Bah Paul Lyngdoh na West Shillong, Bah Lahkmen Rymbui na Amlarem, Bah Mayralborn Syiem na Nongpoh, Bah Synsharkupar Lyngdoh Thabah na Sohiong, Bah Kyrmen Shylla na Khliehriat, Bah Pius Marwein na Ranikor, Balajied Synrem na Shella, Bah Olan Suiñ na Mawsynram, Bah Matthew Beyonstar Kurbah na Mawphlang.
