Nongstoiñ, Nailur 08
Ha ka sngi Ba-ar jong ka taiew ki paidbah ka thaiñ Ri Mulliang kiba kyrshan ban pynneh ïa ka Ri Mulliang C&RD Block ha Nonglang ki la ïa mih paidbah kynthei bad shynrang ban ïa shim bynta ha ka rally bad ban shong kyllaiñ myngor hakhmat ka khyrdop (Gate) shuwa ban rung ha ophis ka Deputy Commissioner ka West Khasi Hills.
Ïa kane ka rally paidbah kaba la sdang najan ka ophis jong ka tnad Soil, la pynkut da kaba shong kyllaiñ myngor hakhmat ka khyrdop ka DC ophis, ïa kaba la pynlong da ka Joint Action Committee Ri Mulliang C&RD Block ba kynthup ïa 40 tylli ki shnong.
Ka jingthmu jong ka rally ka long ban pynpaw ïa ka jingpyrshah ïa ka rai jong ka Sorkar Jylla ban rah ïa ka Ri Mulliang Block na Nonglang kum ka headquarter sha kiwei pat ki jaka.
Ha ka jingïaid rally, ki paidbah ki la pynpaw ïa ka jingpynrem kaba jur ïa ka Sorkar Jylla kumjuh ruh ïa u MLA ka thaiñ u RG Momin ha kaba ki la thoh ruh ha ki placard ïa ki kyntien pynrem.
Shuh shuh hadien katto katne por, ïa kaba ki paidbah ki la poi bad shong hakhmat ka khyrdop jong ka ophis, ka DC West Khasi Hills District kala khot ban ïakren ïa ki nongïalam ka Joint Action Committee Ri Mulliang C&RD Block halor ka jingdawa ka jong ki bad ka jingpyrshah ka jong ki ïa ka jingthmu ka Sorkar ban rah ïa ka Ri Mulliang Block na Nonglang sha Tynghor West Khasi Hills.
Ki nongïalam ka JAC haba ai jingkren sha ki paidbah hadien ka jingïakynduh bad ka DC ki la ong, ka long kaba sngew tynnad ha kaba la ïoh ban pynsngew ïa ka jingsngewkhia baroh halor ka jingthmu jong ka Sorkar ban pynkynriah ïa ka Block.
Shuh shuh la ong ruh ba na ka liang ka DC kala shah shkor ïa ka jingpynpaw ka jong ki, bad la sngewthuh ba ka Sorkar ka pynskhem halor ka kaiphod jong u DC ka West Khasi Hills, dei na kata ka daw ki thmu ban rah ïa kane ka Block na Nonglang sha Tynghor.
Ki la ong ruh ba ha ka jingïakren bad ka DC, ki la pynpaw ïa ka jingbym hun jong ki ha ka jingïakynduh ha kine ki sngi ba la leit hakhmat u Symbud Myntri Rangbah, bad ba kim shaniah ïa ka kaiphod kaba la phah sha ka Sorkar ban rah ïa kane ka Block.
Ki la ong ruh ba ha ka jingïakren bad ka DC ïa kajuh ka phang, la pyni ïa baroh ki jingdonkam kiba don ha Nonglang, la ka long ka Ïew, ka PHC bad kiwei-kiwei namar kata kam lah ba ka block kan leit ban ïeng marwei ha Tynghor.
Ki la ïathuh ba ki la kyrpad ïa ka DC ba kan leh thymmai biang ïa ka kaiphod kaba la phah mynshuwa ha ki snem bala dep bad ban phah biang da kaba thymmai ha kaba ka DC kala pynpaw ïa ka jingsngew eh hynrei ki nongïalam ki la pynbor ïa ka DC bad kata ka dei ka nongrim jong ka JAC ban leh thymmai biang ïa ka kaiphod.
La ong ruh ba ha ka jingïakren kaba la kham neh slem na ka liang ka DC kala kular ban shimkhia ïa kane ka kam bad kan sa leh ïa kaba donkam.
“Ngin ap ïa kaei kaba DC kala kular ba kan peit biang ïa kane ka kam bad kum ki paidbah kin nym dei ban duh jingkyrmen bad nga ngeit ki nongïalam jong ka JAC ki don da kawei pat ka bynta lada jia ba kane ka jingïakren kam urlong,” ong ki nongïalam.
