Shillong, Nailur 08
Ka Sorkar Jylla ka la mynjur ban nym pyndon bynta ïa ki ophisar ka East Jaiñtia Hills District ha ka Fact-Finding Committee bad ban pyntreikam noh ïa ka Facilitation Centre ka MRSSA ha u bnai Nohprah (December), la ong u Samla Donald V Thabah, GS barim ka Khasi Studens’ Union (KSU).
U Samla Donald haba kren hadien ba la kut ka jingïalang bad u Chief Secretary Dr. Shakil Ahammed, haba ïadei bad ki 5 tylli ki mat jingdawa ka KSU kiba la dawa hakhmat u Myntri Rangbah ka Jylla, u Conrad K Sangma u la ong “Mynta ka jingïa-lang, kadei kaba la khot da ka Sorkar Jylla ban buddien halor ka jingïalang ba la dep bad u Myntri Rangbah bad u Symbud Myntri Rang-bah. Ngi la ïakren halor ki 5 tylli ki mat bad pynpaw ka jingkyndit halor ka rukom buh jingthoh ïa ki jingïakren jong ka jingïalang ba la dep,” u la ong.
U Samla Donald u la ong ba ka ‘minutes’ jong ka jingïalang bad u Myntri Rangbah, ka la pynpaw bakla, ba u Deputy Commissionner bad u Superintendent of Police of East Jaiñtia Hills, kin shim ïa ka bynta ba kongsan bha ha ka Fact-Finding Committee.
“La mynjur ba u DC, SP bad kiwei de ki ophisar ka East Jaiñtia Hills, kin nym don bynta ha ka Fact-Finding Committee. Ngi la pyrshah ïa kane ka ‘minutes’. Ka Sorkar ka la mynjur mynta ba kin nym don bynta ha kano-kano ruh. Ïa ka komiti la dep ban thung bad ka jingtip ba bniah yn sa ai ha kine shi sngi ne ar sngi ban wan,” u la ong.
Haba ïadei bad ka Meghalaya Residents Safety and Security Act (MRSSA), u samla Donald u la ong ba ka Sorkar ka la pyntip ba ka Facilitation Centres ha Umling bad Rattacherra bad ki District Task Force kin sa sdang treikam noh ha ki taïew jong u bnai Naiwieng lane ka taïew ba nyngkong jong u Nohprah.
U la ïathuh ba ka KSU ka pyrshah ruh ïa ka jingpynshisha online ïa ki nongshongwai bad dawa ban aiti ha ki khlieh nongsynshar ban leh ïa kane.
“Ngi pyrshah ban pynrung kyrteng online ïa ki nongshongwai. Ngi don ka jingsngew ba ïa ki briew ki bym itikna dei ban pynshisha da ki khlieh nongsynshar, kum ki Syiem, Sordar, Rangbah Shnong, Waheh Shnong, Nokma bad kiwei-kiwei de”.U la bynrap ba ka Sorkar Jylla ruh ka la mynjur ban pyntreikam noh ïa ka Facilitation Centres shuwa ban pynmih ïa ka ‘application’ ban pynithuh da ka durkhmat.
Ha ka Migrant Workers Act, u Samla Donald u la ong ba ka tnad Labour kan sa pynlong ïa ka workshop ha ka sngi Balang ban ai ka jinghikai ïa ki nongtrei.
“Ki la kular ba ki kyndon jong ka Inter-State Migrant Workmen Act, kynthup ka jingpynrung lang ïa ka CCTNS bad ki kuna, yn sa pynrung lang noh. Kiba pynkheiñ nyngkong ïa ka aiñ kin shah daiñ kuna 10,000, ba ar sien 20,000, bad kaba lai sien 50,000 bad ka shah set patok,” u la bynrap.
Halor ka jingpynkylla ha ka thungkam thungjam , u la ong ki SOP ki la don mynta bad ki la dep ruh ban pynduh ïa ka interview ha ka thungkam ka Grade-D, katba ïa ka rai halor ki kam technical non-gazetted Grade B bad C , la khmih lynti ban leh ha kine ki taïew ban wan.
Halor ka NEIGRIHMS, u Samla Donald u ïathuh ba ka KSU ka la dawa ba ym dei ban thung ïa ka Governing Council, katba ym pat lah pyntreikam ïa ki jingdawa, ka nongrim kaba la kyrshan ruh da ki bor pynïaid ka Institute.
“Wat u Deputy Director ka NEIGRIHMS u la thoh sha nga bad sha ka Sorkar, ba ym pat dei ban thung ïa ka Governing Council, katba ym pat pyntreikam ïa ki jingdawa ka KSU” u la ong.
U samla Donald u bynrap ba la ïohi ba ki la don ki kam ba la leh halor ka MRSSA bad ka jingpynkylla ha ka thungkam thungjam, bad ka Sorkar ka la kular ban sa ai ïa ki jingtip ba bniah hapoh ka shitaïew.
