Shillong, Nailur 08
Ki ophisar ka Assam ki la pyntikna ban ai jaka pynïeng kali na ka bynta ki ‘Tourist Taxi’ ka Meghalaya ha Kad Liengsuiñ, Guwahati bad ki steshon rel bad pan por ruh 15 sngi ban weng noh ïa ki ‘dalal’ kiba treikam ha Khanapara, Paltan Bazar bad ki jaka kiba hajan ka Kad Liengsuiñ.
Ïa kane ka jingpyntikna la pynsngew ha ka jingïalang kaba la long ha ka Sngi Ba-ar hapdeng ki nongïalam ka All Khasi Meghalaya Tourist Taxi Association (AKMTTA), ki paralok na Assam bad ki ophisar jong baroh ar tylli ki Jylla, ong u nongaiktien ka AKMTTA, Bah Balajied Jyrwa.
U la ong ruh ba ha kane ka jingïalang la ïathir halor ki jingeh ba ki nongñiah kali ‘Tourist’ ka Meghalaya ki ïakynduh haba kit ïa ki nongleit-nongwan na steshon rel Kamakhya bad Kad Liengsuiñ Guwahati namar ka jingshah khang bad shah pyndik.
“Ki ophisar ka Assam ki la pyntikna ba kin ym pynthut ïa ngi bad kin pynbiang ïa ki jaka ba la buh kyrpang khnang ba ngi lah ban kit laitluid ïa ki nongleit-nongwan,” la ong u Bah Jyrwa.
Halor ka jingbyrngem jong ki ‘dalal’ bad ki ‘riew shim kabu kiba shim ‘commission’ ha ka dor ba heh, u Bah Jyrwa u la ong, “Ki ophisar ka Assam ki la pan por 15 sngi ban shimkhia haba ïadei bad kine. Hadien kata, ngin sa lah ban leit kit beit ïa ki nongleit-nongwan.”
Halor ka RTA, u la ong ba baroh ar tylli ki Sorkar ki la pynpaw ïa ka jingkwah ban pyntreikam ïa ka.
“Ïa ka RTA la pynshai da ki nongïalam ka Assam. Baroh ar tylli ki Sorkar ki long kiba la khreh. Ngi la ai jingmut ban pynim biang ïa ka Joint Action Committee hapdeng ka Assam bad Meghalaya ban ïakren bad rai ïa ka jingbun ki kali ban shah ha ka shisngi, namarba ka kynthup ïa ki trok bad baroh ki kali kamai na baroh ar tylli ki Jylla. Ngin pynim biang ïa ka JAC bad aiti ïa ka jingtyrwa sha ka Sorkar,” u la ong.
U la ong ba ka Assam kan pynbiang ruh ïa u nombar ïarap na ka bynta ki nongñiah kali na Meghalaya ba kin kynjoh lada jia ba ki don kano-kano ka jingeh.
Ha kaba ïadei bad ka jingdawa ban khang ïa ki kali kiba wan na shabar ka Jylla na ki jaka jngohkai pyrthei ha Meghalaya, u Bah Jyrwa u la ong ba kam pat don kano-kano ka jingpyntikna kaba khatduh.
“Ngim sngewhun ïa kane namarba kam don ka jingpyntikna kaba 100% ban khanglad ïa ki kali nabar ban leit sha ki jaka jngohkai pyrthei ban pyntikna ïa ka jingkamai na ka bynta ki briew jong ngi,” u la ong.
U la pyntip ba kan don ruh sa kawei pat ka jingïalang ha ka 28 tarik u Nailur bad ka tnad jngohkai pyrthei bad ‘Transport’, ki ‘Hotel’, ‘Guide’, ‘Homestay’ bad ki ‘Travel Agency’ ban ïakren balei ba ym jied ïa ki taksi kamai (Local Taxi).
“Ki la kyrpad ïa ngi ban ïarap pynithuh ïa ki jaka sangeh kali ba wan nabar ha Sohra, Jaiñtia Hills, ISBT bad kiwei-kiwei ki jaka. Ngin ïatreilang ban pynkloi ïa ka jingpyrkhing ïa ki kali ba wan na shabar ban rung sha ki jaka jngohkai pyrthei,” u la bynrap.
