Shillong, Jylliew 11:
Namar ba bteng ka jinghap slap ha kine ki khyndiat sngi khamtam ha ki bynta ka nongbah Shillong, ka um ha pung Umïam ruh ka la nang kham kiew kaba nang ai jingkyrmen ïa ki nongshong shnong ba kin nym mad ïa ka jingkyrduh bording ilektrik.
Haduh ka janmiet Sngi U Blei, ka um ha pung Umïam ka la kiew sha ka 3,170 phut.
La ïathuh lypa ba ka jinghap slap kan dang bteng ha Assam bad Meghalaya ha kine ki sngi.
Ka jingjur slap ka la pynlong ïa ka Wah Umkhrah ban nang heh um bad kane ka wah ka tuid ban pyndap um ïa ka pung Umïam ryngkat bad ka Umshyrpi.
Katkum ka jingbatai ka India Meteorological Department (IMD), ka jinghap u slap bajur ka lah ban jia ha Assam bad Meghalaya ha ka 12 tarik Jylliew.
Ha u Jylliew 2022, ka Assam ka ïoh slap kumba 669 mm bad ha Meghalaya pat ka jinghap slap ka long 1,493 mm.
Ka jingjur slap ha kine ki sngi ka la pynlong ruh ïa ki katto katne ki bynta ka nongbah Shillong ban sakhi ïa ka jingdap um ki surok bad phyllaw ïing jong ki briew kum ha thaiñ Pynthorumkhrah, Polo bad kiwei kiwei ki jaka ba kham long madan.
Ka jingbym ïoh ka um ban tuid laitluid ha ki nala bad rud surok ka la pynlong ban jia ka jingdap um ha ki katto katne ki jaka.
