Shillong, Jylliew 11:
Ka tnad Animal Husbandry & Veterinary ka Sorkar Jylla ka la ong ba ka jingdon jong ki masi kiba shah ktah ha ka jingpang at-sniehdoh ne ka ‘Lumpy Skin Disease’ (LSD) haduh ka Sngi U Blei ka long 6080 tylli.
Katkum ki jingtip ba la ïoh na ka tnad, ka jingdon jong ki masi kiba la suba ïap na katei ka jingpang haduh mynta ka long 43 tylli.
Ha kajuh ka por, ka jingdon jong ki masi kiba la koit pura na katei ka jingpang ka long 3279 tylli.
Kumba ka long mynta, ka jingdon jong ki masi kiba dang pang ne shah ktah ha ka LSD ha kylleng ka Jylla ka long 2759 tylli.
Kine ki kynthup ïa 792 tylli ha Eastern West Khasi Hills, 713 tylli ha West Jaiñtia Hills, 487 tylli ha East Khasi Hills, 248 tylli ha Ri-Bhoi, 243 tylli ha South West Khasi Hills, 166 tylli ha West Khasi Hills, 60 tylli ha East Garo Hills, 28 tylli ha South Garo Hills, 13 tylli ha East Jaiñtia Hills, bad 9 tylli ha South West Garo Hills.
Ki 2 tylli ki distrik ki bym don shuh ki masi kiba shah ktah ha ka LSD ki long ka West Garo Hills bad ka North Garo Hills.
Kum shi bynta ban tehlakam ïa ka jingsaphriang jong kane ka jingpang, ka tnad kan sa pynïeng ruh ïa ki jaka ai tika bad jingsumar ha baroh ki distrik kiba shah ktah ha katei ka jingpang naduh mynta ka taïew shakhmat.
Haduh mynta, ka jingdon jong ki masi kiba la ïoh ïa ka tika ïada ka long 5978 tylli.
Shuh shuh ka jingdon jong ki masi kiba shah ktah ha ka jingpang at-sniehdoh ha kylleng ka Jylla haduh mynta ka long kumne harum:
| District | Masi ba shah ktah ha ka LSD |
| 1.East Khasi Hills | 978 |
| 2.West Khasi Hills | 560 |
| 3.South West Khasi Hills | 974 |
| 4.Eastern West Khasi Hills | 1038 |
| 5.West Jaiñtia Hills | 768 |
| 6.East Jaiñtia Hills | 36 |
| 7.West Garo Hills | 152 |
| 8.South Garo Hills | 28 |
| 9.South West Garo Hills | 13 |
| 10.East Garo Hills | 60 |
| 11.North Garo Hills | NIL |
| 12.Ri-Bhoi | 1473 |
| Total | 6080 |
