Shillong, Risaw 30:
Ka Khasi Students’ Union Laban Circle, ka la phah shithi sha u Conrad K Sangma Myntri Rangbah ka jylla ban pynpaw ïa ka jingsngewsih bad ka jingpyrshah jur ïa ka Sorkar bad ki bor District halor ka jingpyndonkam palat ïa ka bor bad ka jingtieng pyntriem ïa ki dkhot jong ka Joint Action Committee kiba pyrshah ïa ka Ropeway Project, kaba kynthup bun eh ïa ki kynthei kum ki nongïalam.
Ka seng ka la pynkynmaw ba a ka 28 tarik u Risaw, 2026, katba ki dkhot jong ka JAC ki dang ap ïa ka rai na ki Rangbah Shnong hadien ki jingkular bapher bapher kiba la ai da ki, la mih katto katne ki jingïakren bad jingïatai hapdeng kine ki arliang mamla, hynrei kane kam dei satia ka jingïakynad kaba don ka jingma ne ka jingthombor pynban, lyngba ki khubor bad ki lad pathai khubor, la sakhi ba ki pulit bad ka kynhun Special Operating Team (SOT) ki la poi mar-mar sha katei ka jaka.
Kane ka jingleh kam long ei ei hynrei ka jingpyni bor jong ki bor pynïaid District bad ki pulit, da ka jingthmu ban pynsheptieng bad ban pynbor ïa ki dkhot jong ka JAC ba kin randien bad weng noh ïa ka jingïakhih jong ki.
Ka Seng ka ïohi ba ki rukom treikam kiba kum kine ki la sdang ban jia biang ha Laban Pyllun. Ka jingpynpoi ïa ka SOT pyrshah ïa ki nongshong shnong jong katei ka thaiñ, khamtam eh ïa ki kynthei, ka long kaba ym lah ban pdiang satia. Ka Seng ka don ruh ka jingsngewkhia kaba jur ba ha ki sngi ban wan, kine ki longkmie kiba la rangbah, kiba long kum ki kmie jong ngi, bad kiwei pat ki nongïashim bynta kin shah byrngem, bad lehse ki pulit kin pynngat ïa ki ha ki mukotduma kiba lamler tang ban pynsangeh ïa ki na kino kino ki jingïakhih ha ki por ban wan.
Ka Seng kan ym shah bad kan ym pdiang satia ïa kino kino ki buit pynbor, byrngem bad pynsheptieng da ka Sorkar, ki bor pynïaid District lane ki pulit pyrshah ïa ki paidbah kiba mih shakhmat ban pynpaw ïa ki jingeh bad ki jingsngewkhia jong ki halor katei ka project.
Ka Seng kam don satia kano kano ka jingpyrshah ïa ki project ne ki jingthmu jong ka Sorkar. Hynrei, kano kano ka project ne ka jingthmu jong ka Sorkar ka dei ban ïoh ïa ka jingmynjur bad jingkyrshan jong ki paidbah, bad kam dei ban ktah ïa ka jinglong jingman ba ïahap bad ka mariang.
Katkum ki kaiphot ba la pynmih da ka Sorkar, la pyni ba katei ka project kan ym don kano kano ka jingktah ïa ki tyllong um ne ïa ka mariang hi baroh kawei. Hynrei, ka JAC bad ki riewstad ha ka liang ka mariang ki pynpaw pat da kawei ka jingsngew. Kumta, ka long kaba eh ïa ki paidbah ban shaniah tylli ha ki jingkren bad ki kaiphot jong ka Sorkar, khamtam eh hadien ki jingshem kiba la jia ha East Jaintïa Hills District, ha kaba bun na ki kaiphot, ki jingbit bad ki Environmental Assessment Reports ki la don ka jingsuba ba la pynkylla bad pynkhreh thok.
Don ruh ki khubor kiba dang khlem pat pynshisha ba yn don ka jingtei ïa ka surok thymmai naduh Sericulture Farm haduh Sawmer ha ki snem ban wan. Lada ka long shisha kumta, la sngewthuh ba kane ka surok ka lah ban don jingïadei bad ka Ropeway Project. Lada pynlong ïa kum kine ki jingtei, kan sa don ka jingpynhap ïa ki dieng bad lehse kan ktah ruh ïa ka catchment area, kaba long kawei na ki tyllong um ba kongsan jong ka thaiñ, bad kaba lah ban pynlong ïa ka jingpynjot ïa ka jingpynbiang um ha ka thaiñ.
Ka Seng ka kwah ruh ban pynpaw ba ki bor pynïaid District kim lah ban kyntait ïa ka jingkitkhlieh jong ki bad pynkit ïa ka lyngkor jong ka jingkitkhlieh halor ka Public Hearing sha ki Dorbar Shnong bad ki Rangbah Shnong, ban pynshai ïa ki paidbah shaphang ka jingktah jong katei ka project ïa ka mariang bad kiwei kiwei ki mat kiba ïadei bad ka project.
Kane ka dei ka kamram jong ki riewstad kiba tbit ha ka liang ka mariang lane ki bor ba don ïa ka jingkhlaiñ bad jingbit ban pynlong ïa kum kine ki jingbishar. Ki bor District ki dei ban pyntreikam pura ïa baroh ki kyndon bad ki rukom treikam kiba donkam ha ka Public Hearing. Hynrei, kane kam shym la jia satia ha kano kano ka bynta jong ka jingpynkhreh ïa katei ka project. Kumta, ki bor District bad ki tnad sorkar kiba don jingïadei kim lah ban shu kynnoh ne pynkit ïa ka jingbakla jong ka Sorkar ban bud ïa ki kyndon sha ki Dorbar Shnong.
Ka Seng ka kyrpad ïa phi, ba phin sngewbha ban shimkhia bad bishar bniah ïa ki jingeh bad ki jingsngewkhia jong ki nongshong shnong ka Laban Pyllun bad ka Shillong hi baroh kawei, kiba ïadei bad ka Ropeway Project.
Ka Seng ka mynjur ba ka jingpynroi ïa ka kam jngohkai pyrthei bad ka jingpynmih ïa ki lad kamai kajih bad ki kam bylla ki long kiba donkam. Hynrei, kine ki jingpynroi kim dei satia ban wan ha ka dor jong ka jingduhnong bad jingpynjot ïa ka mariang jong ngi.
“Ngi kyrmen ba phin shim ïa ki sienjam kiba donkam khlem da pynslem shuh. Ka Seng kan sngewnguh shibun ïa ka jingshimkhia bad ka jingtreikam kloi jong phi”, pynkut ka kyrwoh ba la soi ha shithi da u Jason Laloo kum President bad Shiningstar Chyne Secretary KSU Laban circle.
