Shillong, Risaw 30
Ka Khasi Hills Autonomous District Council ka la ïoh ban rakhe ïa ka jingdap 75 snem mynta ka sngi ha phyllaw ha kaba baroh ki nongkren ki la pyrto ïa ka kyrteng u Bah JJM Nichols Roy uba dei uba don bynta ban shna ïa ka Khyrnit kaba Hynriew (Sixth Schedule) kaba la sdang nyngkong ha u snem 1952.
Ha kane ka sngi la ïoh jingkren da u Bah Strongpillar Kharjana uba dei u Chairman ka Dorbar KHADC uba la shim kum u Kongsan, u Bah Winston Tony Lyngdoh uba dei u CEM u la shim kum u Symbud Kongsan, Bah Titos Chyne uba dei u nongïalam Liang Pyrshah, u Pastor OL Snaitang, ki nongshah khot kyrpang ha jingïadonlang ki MDC ki ophisar barim bad mynta, ki doktor ba ai dawai kynbat.
Haba ai jingkren ha kane ka jingïalang u Bah Strongpillar u la ong ha ka por ba plie ïa ka United Khasi Jaiñtia Autonomous District Council (UKJADC) ha u snem 1952 ki don kiba pyrshah.
U la ong ba un nym pynrem ïa kiba pyrshah namar ki don la ka jong ka jingsngewthuh ïoh ka buh jingeh hadien habud namar ha ri India la pynkha nyngkong ïa ka United Khasi Jaiñtia Autonomous District Council.
U la ong biang ba naduh kito ki snem la sngewthuh ba ki nongïalam ki la shem jingeh haba ki ïaid ïa ka lynti.
U la ong ba ïa ka District Council la pynkha ka dei ha ka por ba ki Rilum Khasi bad Jaiñtia ki hap ha jylla Assam hynrei kum kata ka por la wan mih u Bah Joy uba shemphang ban saiñdur ïa ka 6th Schedule ban ïada ïa ki jaidbynriew rit paid.
Shuh shuh u la pynkynmaw ba ha ri-thor ki don da ki phew klur ngut ki riewlum hynrei kaba donbok ba ki riewlum kiba shong ha thaiñ Shatei Lam Mihngi ki bat ïa ka bor synshar namar ha Meghalaya ki don palat 86 percent.
