Shillong, Risaw 30
Ka Hynñiewtrep National Youths Front (HNYF) Mawlai Circle ka la byrngem ban khang theh ñiut ha Marten, lada ka Sorkar Jylla kam shimkhia ban leh eiei halor ka jingmih ka lyer ba sma iwtung bad ka jingorpait ka kynroh kaba la pynlong ïa u ñiut ba na Marten ban shlei ha surok.
Hadien ba la don ka jingud jong ki paidbah nongshong shnong kiba sah hajan ka Marten, ha ka 30 tarik u Risaw 2026 ka HNYF Mawlai Circle ha ryngkat ki nongshong shnong ka Nongkwar Block-13 ki la hiar ban jurip bad ban peit ïa ka jinglong jingman jong katei ka jaka pynlang ñiut.
Haba la poi ha katei ka jaka la lah ban sakhi ban ïohi ïa ka jingtuid u ñiut sha surok bad ka puhshilum kaba dang ïaleh ban weng ïa u ñiut ba la jan tap ïa ka surok ban hiar sha ka Shnong Mawdun.
Na ka liang u Bah Sanborbor Rapsang President HNYF Mawlai Circle u la ong ba ka long ka jinglehraiñ ïa ka Jylla Meghalaya ba watla ka don shibun ki jaka ba itynnad kiba lah ban khring ïa ki nongwan jngohkai pyrthei katba la pdiang sngewbha ïa ki da ka jingsma iwtung shuwa ba kin poi ha nongbah Shillong.
Shuh-shuh u la pynpaw ka jingsngewkhia kaba jur haba ïadei ka jingsma kaba mih na Marten, ki shnong kiba sah ha syndah katei ka jaka ki mad ïa ki jingpang jingshitom ba laiphew jait, namar kata u la kyrpad ïa ki nongmihkhmat bad ki tnad treikam jong ka Sorkar ba kin shimkhia ban leh eiei ïa ka Marten.
“Lada phim sngewthuh ïa ka jingeh ba ki nongshong shnong ki mat, ko ki Myntri Sorkar wan ban sah tang shitaïew ha syndah ka Marten, ngin pynbiang ka jaka sah, ka bam ka dih, hynrei tang ba phin sngewthuh ïa ki jingeh” la ong u Bah Rapsang.
U la ban jur ïa ka Sorkar ba kam dei ban ap haduh ban da jia kano-kano kaba sniew lane ban ïap briew, hynrei ba kan shimkhia noh mardor ïa kane ka kam katba dang biang ka por.
U la kyntu ruh ïa ka Sorkar ba kan wad jaka bret ñiut noh sha kiwei pat ki jaka, watla ka eh ban ïoh ka jaka ba pura, hynrei ban wad da ka jaka theh ñiut kaba shipor bad ban sangeh shuwa ban theh ñiut ha Marten.
Haba ïoh ban ïakren ïa ki nongshong shnong kiba sah ha syndah ka Marten ki pynpaw ba ka jingsma kaba mih na Marten ka khlaiñ bha bad ki khyllung khynnah ki ïoh bun jait ki jait jingpang namar kata ki la buh ka jingkyrpad ïa ka Sorkar bad ki bor ba dei peit ban pynlong ïa ka jingpeit bniah bad ban lah noh ban weng ïa ki jingeh ba ki la ju mad baroh shi katta.
