Shillong, Risaw 30
Ki kynhun jong ki Muktiar ka Jylla ha ka sngi Thohdieng ki la sei madan ïa ki kam thok jong u Amit Kumar (AG) bad kynnoh ruh ïa ka Sorkar Jylla ba ka pyrshang ban ïada ïa u da kaba kyntait ban jubab ïa ka jingpan jingtip RTI jong ka kynhun ki Muktiar ka Jylla.
Haba kren sha ki nongthoh khubor u Bah T.L Jyrwa uba long u Secretary jong ka Shillong Bar Association (SBA) u la pynshai haba ïadei ka jingsiew ïa u Amit Kumar na ka Sorkar haba ïadei ka jingtrei jong u, kumjuh ruh haba ïadei ka jingkam jong u ba ki dkhot ka kynhun jong u kim ju shim pisa haba ki mihkhmat ïa ka Sorkar.
U Bah Jyrwa u la ïathuh ba haba ïadei kine ki bynta ka kynhun ki Muktiar ka Jylla ki la pan jingtip RTI, hynrei ki tnad ba dei ban jubab ki la kyntait ban jubab bad na ka liang ka kynhun ka la buh jingkyrpad biang ban ai ka jubab, katba na liang ka tnad ka dang pan por shuh-shuh ban ai ïa ka jubab da kaba riehtngen ha ka kyndon ba 11 jong ka RTI Act.
Hynrei, u la ïathuh ba na ka liang ka kynhun ka la ïoh ïa ki jingthoh jingtar kiba pyni ba kumno u Amit Kumar u la shim pisa na ka Sorkar na ki kam kiba u la mihkhmat ïa ka Jylla.
U Bah Jyrwa u la kynnoh ba katkum ki kot ki sla ba la ïohpdiang ki pyni ba u Amit u shim pisa palat haduh hynñiew shah ïa kaba ka Schedule ba ka Sorkar ka la pynmih ba ka dei ban siew ïa ki Pleader Sorkar, kumta ka kynhun ki Muktiar ka kwah ban pyntip paidbah ïa kaei kaba u Amit u la shim pisa na ka Sorkar bad pynpaw ba ka kynhun ki Muktiar kan sa shim ïa ki sienjam ba donkan nangne shakhmat.
“Naduh ba ngi sdang ban ïakhih ïa kane ka mat, ngim don kano-kano ka jingpeit shimet, hynrei ka dei na ka bynta ka jingmyntoi jong ki paidbah, kumta ngi kwah pynshai ïa ki paidbah bad ban pyni ïa ki kam thok kam shukor u Amit Kumar, kumjuh ka jingpyrshang ka Sorkar ban da rapjot ïa ki kam jong u” la ong u Bah Jyrwa.
Shuh-shuh u Bah Jyrwa u la kynnoh ruh ba kane ka jingïaleh ka Sorkar ban da rapjot ïa ka kynhun jong u Amit Kumar ka long ka jingpynlut phut ïa ka pisa jong u paidbah ka Jylla. “Ha kawei na ka jingjia kaba u Amit Kumar u la mihkhmat na ka Jylla ka la don ka jingshah daiñ kuna haduh T.10 lak na ka daw ka jingduna ka jingtreikam.”
U Bah Jyrwa u la pynpaw ba kum ka kynhun ki Muktiar ka Jylla ki dap ka jingsngewkhia haba ïadei kane ka jingshah daiñ kuna ka Jylla da kaba pynpaw ba kane ka jingïakhun jong ki kam dei ba ki shun ïano-ïano, hynrei ka long na ka bynta ka jingmyntoi ki paidbah ka Jylla bad ba kum kine kin ym jia shuh ha ki por ban wan.
