Shillong, Risaw 30
Ka Voice of the People Party (VPP) lyngba u Bah Ardent Miller Basaïawmoit, President, ha ka 30 tarik Risaw, 2026, ka la pynpaw ïa ka jingkyrshan ïa ki nongshong shnong ka Laban Pyllun, ha ka lama ka JAC kiba la dawa ban pynduh ïa ka projek Ropeway.
Haba kren sha ki lad pathai khubor u Bah Ardent u la ong ba ka long kaba biria bad thamula ba ka tnad Jngohkai ka ujor ejahar ïa u ophisar ka KHADC, uba la don bynta ban khang ïa ka jingpyntrei ïa katei ka projek.
“Kan long kaba itynnat, lada ka Sorkar ka ujor ïa ka EC kaba ïalam ha KHADC,” la ong u Bah Ardent.
U Bah Ardent u la ong ruh ba ki ophisar ka tnad Jngohkai kin hap ban pule kot shuwa halor ka rukom pynïaid ïa ki khlaw raid bad ban pynsngew ba kiba don bynta ha katei ka projek, ki la pynkheiñ ïa ka hukum ka Supreme Court.
“Ka VPP ka pynpaw ruh ka jingsngewkhia bad ban pynrem jur ïa ka jingbym suidniew ka Sorkar Jylla, haba ïadei bad ka jingdawa ba shongnia jong ki nongshong shnong ka Laban Pyllun. Balei ka Sorkar kam ujor pyrshah beit ïa ka EC ba synshar ha KHADC? namar ba u ophisar ba don bynta ha kane ka jingkhang, um shym la leh ïa kane ka kam ha ka bor shimet jong u, hynrei u la pyndep ka kamram ba la bthah da ka EC ha KHADC,” la bynrap u Bah Ardent.
