Shillong, Jylliew 11:
Ki ’riew paidbah kiba kynthup naduh ka Sohïong konstitwensi bad napoh ka jylla ki pynpaw ba ki kwah ïa u Bah Amazing Kurbah ba un ïakhun ïa ka ilekshon MDC na ka tiket Voice of the People Party (VPP) na Sohïong konstitwensi ka ban long la shem snem.
Kane ka jingkwah ki paidbah ba un ïakhun na ka shap u prah ka dei hadien ba u la leit rah ‘placard’ sha phyllaw ïing u MLA ka Sohïong, Bah Synshar Lyngdoh ha Sohïong ban pynbor ba un kren eiei halor ka bhah thung kam thung jam hapoh ka jylla. Kane ka wan jia ruh hadien ba u Bah Ardent M Basaïawmoit, MLA ka VPP na Nongkrem u la pynlong ïa ka jingïakhih shah thngan ha Additional Secretariat haba ïadei ban khmih bniah biang ïa ka bhah thung kam hapoh ka jylla ha kine ki bnai ba dang shu dep.
Ha ka por ba u Bah Ardent u la shong shah thngan, u Bah Amazing u la leit ban ai mynsiem da kaba wan shong ha ka por mynsngi bad don ha ka por mynmiet ruh.
Katkum ka jingkynthoh (Comment) ki paidbah ha Social Media kiba bun ki pynpaw ba ki kwah ïa u Bah Amazing Kurbah ba un ïakhun ïa ka ilekshon MDC ha u snem ban wan na ka shap u prah.
Lada jia u Bah Amazing Kurbah un rai ban ïakhun ïa ka ilekshon MDC u hap ban jied kawei na ki ar tylli ki constituency kata ka Sohïong ne Mawphlang constituency, namar u dei shnong na ka thaiñ Rangshken kaba ki paidbah ki thep vote ha ka ilekshon MLA ha Sohïong constituency bad ha ka MDC ki thep vote sha Mawphlang constituency.
Kum ban shu pynkynmaw u Bah Amazing Kurbah u dei u khlur ïalap ilekshon jong u kyrtong ka UDP na Sohïong, Bah Synshar Lyngdoh uba dei ruh pyrsa trai jong u Bah HDR Lyngdoh (bam kwai ha dwar u blei) haduh ban da jop ïa ka ilekshon.
Haba u nongthoh khubor ha kine ki sngi u la ïoh ban ïakren bad u Bah Amazing, u la pynpaw beit ba u dang don bad ka seng UDP haduh ban da kut ka san snem wat la u la leit ban pyrta bad rah placard ha ïingsah jong u MLA ba mynta ba bynta ban kren eiei halor ka bhah thung kam thung jam.
Nalor kata, ki khubor kiba la saphriang la ïohi ba u Bah Amazing u la ïoh ban shondur bad u President ba rangbah ka VPP, Bah Ardent M Basaïawmoit. Halor kane ka khubor u Bah Amazing u la kyntait war namar u dang dei beit u dkhot ka UDP.
Ki khubor kiba la ïoh lum ki ïathuh ba kin bun bha ki ’riew paidbah bad ki ’riew rangbah na ka seng UDP, NPP, Congress bad HSPDP na Sohïong constituency kin leit ban pynïasoh sha ka VPP na ka bynta ban pynkhreh ïa ka ilekshon MDC ha u snem ban wan.
