Nongstoiñ, Jylliew 11:
U MLA ka Nongkrem, uba long ruh u nongïalam ba rangbah ka Voice of the People Party (VPP) u la ong ba nalor ka bhah thung kam ne ka ‘Reservation Policy’ ka mat kaba bud kaba ka seng kan dawa na ka Sorkar ka long ban weng ïa ki Chairman kiba la thung palat pud kumjuh ki ‘Consultant’ kiba long ka jingpynlut phut ïa ka pisa u paidbah.
Ïa kane, u Bah Basaïawmoit u la ong haba kren sha ki paidbah ka Rambrai konstitwensi ha ka jingïalang kaba la long ban pynsngewthuh bad pynshai ïa ki nongrim jong ka seng bad ka jingpynrung dkhot (sha ka seng) kaba la long ha ka Sngi Saitjaiñ ha Mount Calvary Parish, Rambrai.
U la ong ruh ba lada ki paidbah ki jied ïa ka VPP, ka thma ka long pyrshah ïa ka ka bamsap bad yn wanrah ïa ka synshar khadar kaba khuid ba suba.
“Phi lah ban bam ha ki san snem kiba la leit, hynrei mynta ba la don ki MLA ka VPP, ïalade ruh ngin ym bam bad ïa kiwei ruh ngin ym shah ba phin bam…kata ka dei ka thong jong ka VPP ba ngin wanrah. Ngi ïeng naba ngi sngewthuh ba ka ri ka la hiar arsut namar la bam ym dei tang ka bamsap, hynrei ka dei ka bamduh jong ki nongsynshar ki jong ngi,” la ong u President ka seng.
U Bah Basaïawmoit u la pynpaw ruh da kaba ong, “Kiba la rem ha ka ilekshon na kiwei ki seng, ki ïa long Chairman mynta. Mano ba siew tulop ïa ki…ym dei ka pisa u paidbah…ban siew tulop ïa ki nonghikai ym don pisa, ban pynbiang dawai ha ki aspatal ym don pisa, u nongrep u shah lehbeiñ, u kontraktor um ïoh kam ïoh jam namar la trei hi ki Myntri Sorkar ha kine ki sngi, kam Sorkar ruh ym ïoh, kam dei tang ka bamsap, ka dei ka bamduh. Don hok seh kita kiba la rem ilekshon kiba u paidbah u la kyntait ba un dang ïoh ïa ka tulop Sorkar, na kata ka daw ka VPP kan ym ailad.”
