Shillong, Jylliew 11:
Ka jingïai bteng ban ther biang jong u slap ha Shillong haduh ka step jong ka Sngi U Blei ka la pynlong ïa ki jaka ha ka thaiñ Langkyrding, Pynthorumkhrah ba kan shlei um haduh phyllaw ïing briew. Kane ka dei namar ka jingbym biang ki nala um ki ban tuid sha wah Umkhrah kaba dei kawei na ki wah kaba tuid sha pung Umïam.
Kane ka jinghap u slap ha Shillong ka la sdang naduh ka step Sngi Thohdieng haduh janmiet bad bteng biang ha ka step Sngi Saitjaiñ bad rang biang baroh shi sngi. Hynrei u slap u la bteng biang naduh ka por 5:30 janmiet haduh ka step Sngi U Blei.
Ha kane ka jinghap slap ha ka Sngi Thohdieng la ïohi ba ha ka thaiñ Pynthorumkhrah ka la don ka jingshlei um kaba jur ha kaba ki surok bad phyllaw ïing briew ki la dap um. Kane ka la bteng biang mynta ka Sngi U Blei haba u slap u la hap naduh shiteng synñia jong kane ka sngi kat haduh ba ka la buh jingeh ïa ki briew ban mih sha surok namar ki lynti ïaid kjat ki la dap um.
Ha kawei ka liang da kane ka jingbteng ban hap jong u slap haduh ka Sngi U Blei ka la sdang ban ai jingkyrmen ïa ki nongshong shnong jong ka jylla naba ka um ha pung Umïam ka la sdang ban kiew khyndiat. Kane ka pung ha Umïam ka dei ruh ka jaka den um ban pynmih bording khnang ban ïoh sam sha ki paidbah ka jylla namar ha kine ki sngi ka la pynduh jingkyrmen namar ka jingrngat na ka rang tyrkhong ka suiñ bneng.
Nalor kane, la ong ruh ba ka jinghap jong u slap ka la ai jingkyrmen ïa ki nongrep kiba shaniah tylli ha ka rep ka riang na ka bynta ka jingim jong ki.
Kumba long man u snem lada ka jinghap u slap kan bteng baroh shi taïew ka jingdap ka um ha pung Umïam ka lah ban don jingkyrmen khnang ban nym don shuh ka jingpynlip bording hapoh ka jylla.
