Shillong, Jylliew 12:
U Myntri ka tnat Social Welfare, Bah Paul Lyngdoh ha ka sngi Nyngkong u la pyntip ba ka Sorkar ka la dep ban ithuh ïa ki hynñiew tylli ki district kum kita ki ‘hotspots of drug addiction and trafficking’ ne ki jaka ba la kynrei bad jyllei ka jingkhaïi bad dih drok, bad kiba dei ruh ki district ha kaba ka jingpyndonkam ïa u drok ka la jur bha. Kine ki district ki long ka East Khasi Hills, East bad West Jaiñtia Hills, Ri Bhoi, West Garo Hills, West Khasi Hills bad South Garo Hills.
Nalor ki district na ka liang jong ka Sorkar ka la dep ban ithuh ruh ïa ki shnong bapher bapher bad ki dong kiba don hapoh kitei ki district kum ki jaka ba jyllei bha u drok.
Ha East Khasi Hills, kine ki shnong ba jyllei bha ka jingpyndonkam drok, ki kynthup ïa ka Madanrting, Jhalupara, Laitumkhrah, Nongthymmai, Polo, Nongmensong, Mawlai, Mawprem, Lumdiengjri, Ïew Mawlong, Mawngap, Mawryngkneng bad Pynursla.
Haba kylli halor ka jingdon jong ki briew ba pyndonkam drok hapoh ka jylla, u Bah Paul u la ong ba ka sorkar mynta ka dang pynkhreh ïa ka thup kaba thymmai bad ong ruh, “Ba ka jingkylli kam dei tang halor ka jingpynthymmai ïa ka jingkheiñ jong ka jingdon ki nongpyndonkam drok hynrei ha ki katto katne ki bynta, ki don kijuh ki briew kiba leit sha ki rehab centre ne jaka ai jingsumar da kaba pyndonkam da ki kyrteng bapher bapher, kumta ka don jingeh ban ïoh ka jingkheiñ kaba paka.”
Kumta, mynta hapoh ka projek ‘DREAM’ kaba dei ka kyrteng ba lyngkot na ka bynta ka Drug Reduction Elimination and Action Mission, ka mission ka ban trei na ka bynta ban rat dyngkhong ïa u drok ha Meghalaya, baroh ki centre kin hap ban pyndonkam tang kawei ka rynsan, kata ka online bad offline, khnang ba ka tnat kan don ka jingkheiñ kaba paka, ha kaba ïa ka kyrteng jong ki nongdih drok kiba ïoh jingsumar watla buhrieh, yn lah ban ai pat ka jingkheiñ bap aka.
Haba kylli halor ki rehabilitation centre kiba don ha kylleng ka jylla, u Myntri u la ong ba baroh ki rehabilitation centre ha kylleng ka jylla ki dei kiba la kyrshan bad bei pisa da ka sorkar jylla.
Nalor kane, u la pyntip ruh ba ka sorkar ka dang trei ban thaw ïa ki de-addiction centre ki ban sa pynïaid pura da ka tnat Social Welfare.
Ha ka bynta kaba nyngkong, ka sorkar kan sa peit bad bishar bniah shwa ban buh ha ki 3 tylli ki district na ki hynñiew tylli kiba la pynbna kum ki district ba jyllei u drok.
Nalor kata, u la ong ruh ba ki don san tylli ki de-addiction centre hapoh ka jylla kiba la kyrshan pisa pura da ka Sorkar bad kine ki kynthup ïa ka Break Through Centre ha Khliehtyrshi, Jowai, ka Kripa foundation, KJPA New Life De-Addiction Centre, New Hope De-Addiction centre kiba ha Shillong bad ka KJPA Selda ha Nongstoiñ. Ha kine ki centre, la ai ka jingsumar ei sha kito kiba la ngat ha u drok, la pyntip u Myntri.
Shuh shuh, u Myntri u la pyntip ruh ba ki jingpynsngew jingkhia na ka liang ki tnat bapher bapher kiba don bynta bad kane ka kam, la shimkhia ha ka jingïalang ba la pynlong ha ka sngi Nyngkong, bad nangta la pyntip ruh ba ka sorkar kan sa kynthup lang ruh ïa ki samla pule lyngba ka students’ cadets ha baroh ki skul.
