Shillong, Jylliew 12:
Katto katne sngi hadien ba la mih ka hukum ban nym die ïa ki dohkha kiba wanrah nabar Jylla namar ki dei kiba la khleh dawai ‘formalin,’ u Myntri ka tnat ri dohkha, u Bah A.L Hek u la ong ba kano-kano ka hukum kaba khang ban wanrah ïa ki mar bam nabar ka Jylla kiba hap hapoh ka tnat ri dohkha bad ka tnat ri jingri, dei ban shim rai da ka Sorkar, namar tang ha kawei ka district ym lah ban leh haduh ban da khang syndon.
U Bah Hek u la ong ba ka hukum kaba pynmih da ka Commissioner of Food Safety ka dei kaba la leh da kaba pynshong nongrim katkum ka kaiphod kaba la pyni da ka tnat Food Safety. U la ong ba ka tnat Food Safety ka lah ban leh ïa kata ka kaiphod, hynrei kat ban shim rai hap ban leh hi da ka Sorkar.
Kane ka jingkren u Bah Hek ka long kum ka jingïatyngkhuh bad ka hukum ka Commissioner of Food Safety kaba la leh katkum ka jinglap jingshem ka tnat Food Safety kaba la lap ba ki dohkha kiba wanrah sha Jylla bun kiba la khleh dawai ‘formalin.’
U Bah Hek u la ong ba u la ïakren bad ka DC ka East Khasi Hills district ba kam lah ban long ba lada khang ban wanrah ïa kano kano ka mar bam sha kane ka Jylla, ka jingkhang ka dei ban long salonsar ha baroh kawei ka Jylla, ym tang ha kawei ne ar tylli ki district, bad ïa kata ka rai ban khang dei ban shim da ka Sorkar.
Shuh shuh u Bah Hek u la ong ba ïa kata ka kaiphod jong ka Food Safety yn sa wanrah sha ka tnat ri dohkha jong ka Sorkar ban ïakren kham sani ïa kata ka kaiphod, la ka long ne em kaba dei ban khang ïa ka jingwanrah dohkha na shabar.
