Shillong, Jylliew 12:
Ka Khun Hynñiewtrep National Awakening Movement (KHNAM) ka la bnoh biang ïa ka Sorkar Jylla halor ka jingpyntrei kam ïa ka Roster System da kaba ong ba ka Sorkar ka ong ba ka Roster kan ïaid nangne shakhmat (prospective) katba ka jingbuh jingkheiñ ha ka Roster Register/Account pat la shim naduh u snem 1972 kaba thew ba ka roster kan ïaid na shadien (retrospective).
Ha u kyrwoh, u Working President ka KHNAM, Bah Thomas Passah u la ong ba u Myntri Rangbah, Conrad K Sangma u shu pynkyllaiñ da kaba ong ba ka dei ka kam kaba ïai bteng “Continuous Process” tang ban pynbiej bad ïalam bakla ïa ki seng saiñ pyrthei bad ki seng bhalang ban ong ba kam dei shuh kaba leit nadien trai (retrospective).
“Kiba kham shemphang hi ki sngewthuh ba kane kaba u pynkylla ruh ka dang dei hi ka retrospective roster system bad ngi lyngngoh ba ki seng (UDP, HSPDP bad Congress) ki ngop ha kane ka jingpynbeit ka NPP. Naduh ba sdang u Myntri Rangbah u la shu ong beit ba kadei ka kam kaba ïai bteng (continuous process) bad ym don retrospective lane prospective. Ha ka jingïalang ki seng saiñ pyrthei (political party meeting), haba ka seng ka buh jingkylli, “lada kam dei kata ka retrospective te kumno pat ka MPSC ha u Lber 2023, ka pynmih ïa ki result ha kaba 11 tylli la ïoh ki paid Garo bad tang 5 tylli la ïoh ki Khasi?” la ong u Bah Thomas.
U la ong ba ka Sorkar ka la phla pat ba hashwa u Jymmang 2023, ki Garo ki ïoh bun namar kadei ka retrospective hynrei ki la kular ban pynmih ïa ka OM bathymmai ban pyntreikam noh Prospectively ïa ka Roster. Hynrei ngi ïohi ba u Myntri Rangbah haduh mynta u dang ïai ong ba ka dei ka continuous process bad ïa ka ‘data’ donkam ban shim jingkheiñ naduh u snem 1972 (retrospective)
“U conrad u ong ba ïa ki post ki bym don ne biang ki ‘data’ ka roster point kan sdang na u 1. Hynrei, ngi tip ba baroh ki post kim biang ‘data’ shuh haduh u 2022 namar ki result bad notification jong ka MPSC kim pyni category-wise break-up jong kito kiba shah thungkam ha ki snem 1972-2022. Te namar kata, ym don jingthoh katno ngut bad kiei kiba ïoh na ka UR/Open, kiei kiba ïoh na ka Khasi-Jaiñtia quota, kiei kiba ïoh na ka Garo quota, bad kiei kiba ïoh na ka OST quota. Bad dei halor kane ka nongrim ba ka KHNAM ka ïai dawa ba dei beit ban sdang ïa ka roster na u 1 ïa baroh khoit ki post,” la dawa u Bah Thomas.
