Nongstoiñ, Jylliew 12:
Ka jingbym pat trei kam jong ar tylli ki block kiba dang shu plie thymmai da ka sorkar ha u snem ba la dep (2022) hapoh ka Rambrai Jyrngam Constituency ka la pynlong ïa katto katne ngut ki ’riew pawkhmat jong ka thaiñ Rambrai hapoh ka jingïalam ka Kong Aicifull Khar Musulman ban leit ïakynduh ïa u Bah Garod LSN Dykes, Deputy Commissioner (DC), West Khasi Hills District ban pan jingshai halor katei ka bynta.
Kitei ar tylli ki Block ki kynthup ïa ka Ri Muliang C&RD Block bad ka Rambrai C&RD Block.
Ka Kong Aicifull Khar Masulman ka la ong ba ha ka jingshisha ka jingplie ïa kitei ki ar tylli ki block la ap khmih lynti ba kan pynsuk shibun ïa u paidbah, hynrei kitei baroh ar tylli kat haduh mynta mynne kim pat lah ban treikam pura ha baroh ki liang. Kane ka jingpynslem jong ka sorkar ban pynbiang ïa ki jingdonkam ka long kaei kaei kaba pynduhnong shibun ïa u paidbah jong ka thaiñ namar bun ki la leit donkam ha katei ka ophis pynban ki hap ban phai thylli.
Nangta, ka la ong ruh ba haduh mynta kim pat don ki nongtrei kiba pura bad ka dang dkoh shibun ha ka rukom treikam namar ka jingbym pat thung ïa ki post bapher bapher. Kumta ka Kong Aicifull ka la ong ba kan ïai pynlong ka jingbuddien ïa katei ka kam tat haduh ban da seisoh.
Shuh shuh ka la ong ruh ba ka thaiñ Langpih ka la donkam kawei ka bank namar ki paidbah kiba ïoh ban die wat tang khyndiat u sying bad u synsar ki hap ban wan thep pisa shaduh Nongstoiñ, bad nalor kata ki tymmen ki kro ruh kiba ïoh ïa ka baibam tymmen kiba la ïoh tang 500 tyngka na ka sorkar ki hap ban wan shim naduh Nongstoiñ bad ki hap ban pynlut haduh 300 spah tyngka tang ka bai kali ban wan shim ïa ka 500 tyngka.
Ha katei ka sngi nalor katei ka longkmie la donlang ruh u Bah Spasterlin Nongrem, Secretary ka shnong Mawïamsyiem, u Bah Piïon Ramri Sordar shnong Nongkdait, u Bah Phangstar Nongsiej Sordar ka shnong Mawphansien bad kiwei kiwei.
