Shillong, Jylliew 12:
U Myntri ka tnat ri dohkha, Bah A.L Hek u la ong ba ka shong eh ha ki nongrep ban pynkiew ïa ka jingpynmih dohkha lada ki shim shisha ïa ka kam ri dohkha kum ka kam ban pynim bad ai kamai.
Ka Meghalaya kam pat lah satia ban pynmih dohkha wat hadien ba la pyntreikam ïa ka skhim State Aquaculture Mission naduh u snem 2012 ha kaba la ai skhim ruh ïa ki nongrep ban tih pung ban ri dohkha ha kylleng ka Jylla.
Hynrei kine ki pung kim shym la lah ban pynmih dohkha bha kumba la khmih lynti, hynrei la sakhi ba ki kylla long pynban ki jaka khalai ban ïakop khwai dohkha.
U Bah Hek u la ong ba ka Jylla ka don bha ka lad ban pynmih dohkha nalade namar ka skhim ruh ka don kaba ai ka Sorkar bad lada ki paidbah ki shim kum ka lad ban pynim ja, kan poi ka por ba wat la mynta ka Jylla ka shaniah haduh 70 na ka 100 ban ïoh dohkha na shabar, hynrei kan poi ka por ba ka Jylla, lada ki bun kiba ri jingri naduh ki sniang, ki syaiar, kan shaniah halade bad ïeng ha la ki jong ki kjat.
Kumta u Bah Hek u la kyntu ïa ki nongrep kiba don jaka ban ri dohkha ba kin sdang noh namar kane ruh ka dei ka lad ai kam ïa ki briew ha nongkyndong.
Haba kylli halor ka jingbym lah pynmih dohkha ki pung kiba kylla pynbna ka jingkhalai ban ïakop khwai dohkha, u Bah Hek u la ong ba um ngeit ba ka ïakop khwai dohkha ka dei ka khalai namar kum ka jingïalehkai phutbol bad kiwei ki jingïalehkai ruh ka ju don ka jingïathong.
U la ong ba lada trei shitom ban ri dohkha, ka jingpynmih dohkha kan nang kiew sa kumba 30% namar mynta ka Jylla ka pynmih tang 30% hynrei dang shaniah ban wanrah dohkha na shabar kumba 70%.
Nalor kata, u la ong ba ha kine ki san snem ban wan, lada ka Jylla ka lah ban pynmih dohkha kumba 50% kan dei ka jingjop kaba khraw, namar sa 50% ka Jylla ka lah ban shu wanrah dohkha noh na Assam khlem da shaniah shuh ban wan ki dohkha na Andhra Pradesh.
