Shillong, Jylliew 12:
U Myntri ka tnat Social Welfare ka jylla, Bah Paul Lyngdoh u la pyntip ba ka Sorkar Jylla shen kan sa pynmih noh ïa ka jingpynbna jong ka jingthaw ïa ka Advisory Board ban lah pyntreikam ïa ki kyndon jong ka aiñ Prevention of Illicit Traffic in Narcotic Drugs and Psychotropic Substances, (PIT NDPS) Act 1988 hapoh ka jylla.
U Bah Paul u la pyntip ïa kane haba kren sha ki lad pathai khubor hadien ba la wai ka jingïalang bad ki ophisar na ka tnat pulit, ki ophisar ka jylla bad ki nongïalam na ki kynhun bapher bapher, kiba la ïatai halor ka jingjyllei u drok hapoh ka jylla.
U Bah Paul u la ong, “U Nongbishar ba la shongthait jong ka ïingbishar u Shivaji Pandey, uba long ruh u Chairman jong ka State Consumer Council, u la ai ïa ka jingmynjur da ka jingthoh ban long u Chairman jong ka Advisory Board bad kane ka la plie lynti ïa ngi ban pyntreikam noh ïa kane ka aiñ.”
Shuh shuh u la ong ba ki kam kiba ïadei bad u drok, la pynrung case hapoh ka Narcotic Drugs and Psychotropic Substances (NDPS) Act 1985, hynrei ki la don pat katto katne ki jingdkoh khamtam haba ka Section 64 A jong katei ka aiñ kaba ailad ïa ki nongpyndonkam ïa u drok ban lait na ki jingshah pynshitom ha ka aiñ.
U Myntri u la ong, wat la ki la don ki aiñ kiba pyrkhing kum ka PIT NDPS Act 1988, hynrei ym shym la lah ban pyntreikam ha ka jylla namar ka jingbym don ïa ka Advisory Board.
“Mynta haba u nongbishar ba la shongthait u la mynjur ban long u Chairman, kumta ka sienjam kaba ngin shim ka long ban pynskhem noh ïa ka advisory board bad ki nongdie ne nongkhaïi drok kin shah pynngat noh ha ka PIT NDPS Act ha kaba yn pynskhem ïa ka jingkem ïa ki bad ban pynthikna ba kim dei ban ïoh jamin ha ki lai bnai,” la ong u Bah Paul.
“Hapoh katei ka aiñ ki briew kiba don ïa ki dak sniew ba ki dei ki nongdie drok, la ki dei kiba rit, pdeng ne heh ki lah ban shah pynngat ha katei ka aiñ bad kin shah set hapoh patok na ka bynta lai bnai ïa kaba lah ruh ban pynjlan shaduh shi snem,” la ong u Myntri.
Nangta, u la ïathuh ba ka jingïalang ka la ïatai sani halor ka jingdonkam ban pynkhlaiñ ïa ka Narcotic Cell kaba don mynta tang 3 ngut ki pulit ophisar. Kumta yn sa thung bun noh ïa ki ophisar ha katei ka tnat khnang ba kin lah ban shakri ha baroh ki district jong ka jylla ban lah tehlakam ïa ka jingpynïaid ïew ïa u drok ha ka jylla.
Ha kaba ïadei bad ka jingïoh kurup bun ïa u drok na Lumshnong, East Jaiñtia Hills District ha ka 11 tarik mynta u bnai bad halor ka jingkylli, “Balei ka tnat Custom bad ki pulit kim shym la lah ban khmih bniah ban lap ïa une u jingdih pynbuaid na ka Entry Point”, u Bah Paul u la kubur ba ka don ka jingduna na ka liang ki bor ba dei khmih. Hynrei ka sorkar kan pyrshang ban lap ïa kine ki jingdkoh haba ki mih hangno-hangno ruh. U la ong ba ka jingïoh ban kurup pat ïa u drok ba bun ka pyni ruh ba ki bor Sorkar kim shym la ïohthiah, ha kaba la lah ban khanglad noh ïa ka jingthmu ban pynpoi ïa une u jingdih pynbuaid sha ki bynta bapher bapher ka jylla.
