Shillong, Jylliew 12:
U khlieh duh ki pulit ka jylla lane u Director-General of Police (DGP) u la pyntip sha ka Meghalaya High Court ba kiba bun na ki trai/nongpynïaid jong ki karkhana thang dewïong be-aiñ ki dei kiba na ka jylla Assam bad ki la leh ïa kine ki kam be-aiñ ha Meghalaya, bad nalorkata, ki la paw shuh sa kiwei pat ki kam ‘Benami’.
Kane ka jingpyntip jong u DGP da ka jingthoh sha ka High Court ka long halor ka jingtreikam ki karkhana thang dewïong be-aiñ khamtam ha ka thaiñ Shallang, West Khasi Hills.
Na ka liang u nongmudui pyrshah ïa ki karkhana thang dewïong be-aiñ ha ka Lah Sngi U Blei u la pyntip ba kitei ki briew na Assam ki dei kiba pawkhmat bha bad ki ïaid ki ïeng laitluid ha Guwahati bad kiba bun na ki nongshong shnong ki tip bha ïa ki kam kiba ki leh bad shaei ba ki don bad ki leit.
Ka High Court ka la pynpaw ïa ka jingkyrmen ba ka tnat pulit jong ka jylla kan shim ïa ki sienjam katkum ki kyndon aiñ bad ban trei kloi. Ka la bthah ruh ïa u DGP ba un ai jingtip biang sha ka High Court halor kane ka bynta ynda la shong bishar biang ha ka 3 tarik Naitung, 2023.
Ha kawei pat ka liang, u Justice (Retired) BP Katakey u la aiti ïa ka kaiphod kaba 14 sha ka High Court, bad ha kata ka kaiphod, la pynpaw ïa ka jingdon kyrhai jong ki karkhana thang dewïong bad karkhana saiñ nar. Katkum kane ka kaiphod, ki don 13 tylli ki karkhana thang dewïong kiba treikam ha East Jaiñtia Hills katba 38 tylli kiwei pat ki karkhana kim treikam satia.
Shuh shuh la pyntip ba ki artylli ki karkhana thang dewïong ha West Jaiñtia Hills bad saw tylli ha South West Khasi Hills kim treikam satia. Ha West Khasi Hills, ki don saw tylli ki karkhana thang dewïong kiba treikam katba 61 tylli pat kim treikam satia. Nalorkata, ka don sa kawei ka karkhana saiñ nar.
Ha Ri-Bhoi pat, ym don satia ki karkhana thang dewïong, hynrei san na ki hynñiew tylli ki karkhana saiñ nar ki treikam.
“Ka long kaba eh ban pdiang ba ïa kiba kum kitei ki jingtip ba la ai da u Justice Katakey kim don satia bad ka sorkar jylla lane ba ka sorkar jylla kam leh eiei ban peitngor ïa ka jingtreikam ki karkhana thang dewïong bad karkhana saiñ nar kiba ïaid bad treikam khlem jingbit,” la kynthoh ka High Court.
Namarkata, ka High Court ka la bthah ïa u DGP ba un ai da ka jingthoh halor katei ka jinglap jong u Justice Katakey. Ka la ailad ruh ïa u nongmudui ba un pyni ïa la ka jong ka nongrim da ka jingthoh ha kaba ïadei bad ka jingthoh ba la ai da u DGP ha ka 8 tarik Jylliew, 2023, bad kumjuh ruh halor ka kaiphod jong u Justice Katakey.
U nongmudui u lah ruh ban ai jingtip shuh-shuh ha kaba ïadei bad kitei ki briew na Assam kiba dei shisha kita ki trai bad ki nongpynïaid jong ki karkhana thang dewïong bad karkhana saiñ nar kiba treikam ha Meghalaya.
Hynrei, ka High Court ka la ong ba kane ka hukum kan ym khanglad ïa kito ki karkhana kiba treikam hadien ba ki la ïoh jingbit ba kin bteng bad ka kam jong ki. Tangba ka la bthah ïa ka sorkar jylla ba kan peitngor bha halor kine ki karkhana khamtam ha kaba ïadei bad ka tyllong jong u dewïong uba ki ïoh ban pyndonkam.
