Shillong, Jylliew 12:
Ka rong pyninam ki dur thoh ba la jer ‘Where the Mind is Without Fear’ la pynlong ha BTU Gallery, Bangkok, Thailand ha kaba la sdang plie ha ka Lah Sngi U Blei.
Ïa kane ka rong pyninam shityllup pyrthei la pynphuh pynphieng da ki kynrem ki lyndan na kylleng kum u Vipul Pawar, khliehduh ka Embassy of India, u Mohammad Abdul Hye, Nongkit ‘tien syiem ka Ri Bangladesh sha Thailand, Prof. Suchat Thaothong, Khliehduh ka BFA, Faculty of Fine and Applied Arts, Bangkokthanburi University, u Mathasit Addok, Dean of Faculty of Fine and Applied Arts, Bangkokthanburi University, bad ka Dr. Suriya Chayacharoen, Director ka BTU Gallery.
La pynkhreh bad pynbit pynbiang ïa kane ka rong pyninam da ka Positive Energy Art Foundation, Shillong bad Faculty of Fine and Applied Arts, Bangkokthonburi University, Thailand.
Ki don da ki spah tylli ki dur-thoh ba la thohdur da ki spah ngut ki barikor na kylleng ka pyrthei, kaba kynthup kumba 30 ngut na Ri India ha kaba la mihkhmat katto katne ki barikor na ka jylla Meghalaya.
Kum u riewtbit ban pyninam thohdur, u Dr Prakash Kishore u la shim la ka bynta bad kiwei pat ki barikor na jylla ki long u Bah Raphael Warjri, Benedict S Hynñiewta, samla Naphisabiang Khongwir, Dipankar Sinha bad Divesh Baruah kiba la pyninam ïa la ki dur thoh ba kynsai ha katei ka lympung ba shityllup pyrthei.
