Shillong, Jylliew 12:
Ka Deputy Commissioner ka East Khasi Hills, Kong R. M. Kurbah ha ka Lah Sngi U Blei ka la ong ba ka jingpyntreikam ïa ka hukum halor ka ‘Odd-Even’ ne ka jingïaid kali pud sngi kan sdang naduh ka Sngi Ba-ar.
Ka DC ha kine ki khyndiat taïew ba la dep ka la pynmih ïa ka hukum ba naduh ka 5 tarik Jylliew, 2023, ki kali kamai ba kynthup ki bos STPS, Maxi Cab, bad ki taksi kin ïaid noh pud sngi na Kashari Point-Khyndailad-Motphran.
Halor ka jingpyntreikam ïa ka ‘Odd-Even’, ka DC ka la ong ba ïa kane, la shim beit thik na ka hukum jong ka ïingbishar da kaba kdew ïa artylli ki jaka pdeng.
Ha kajuh ka por, ka la pynshai ba kam shym la ong ba ka ‘Odd-Even’ kan treikam ha kiwei pat ki bynta jong ka sor, hynrei tang ha katto-katne ki jaka namar ka jingkhapngiah.
Haba kdew ba ym shym da pyrkhing than eh haba ïadei bad katei ka bynta, ka la ong, “Nga la ïoh pdiang ïa ka shithi na kine ki briew ba ki kwah ban leit sha ïingbishar…ki tynjuh ïa ka hukum jong ka ïingbishar. Kumta nga dang ap ïoh don kaei-kaei halor kane hynrei mynta ka taïew ngin peitngor.”
Na ka liang jong ka, ka la ong ruh ba namarba ka jingdheng kali ha kitei ki 2 tylli ki jaka ka la manbha naduh ba la pyntreikam ïa katei ka hukum, kumta yn pyntreikam pura noh ïa ka naduh ka Sngi Ba-ar.
Haba kylli balei katei ka hukum kam treikam lang ïa ki kali shimet, ka Kong Kurbah ka la ong hadien ka jingkhmih bniah, lyngba ka kaiphod, la lap mano ba wanrah ïa ka jingkhapngiah bad namar ba duna ka jaka, kitei ki kali ki ïaid pyllun-pyllun ha kajuh ka jaka naba kim don jaka ban ïeng.
“Kumta, lada ngi weng noh shiteng na kitei ki kali na surok, kan don jaka ïa baroh ban ïaid bad ngi dei ban buh jingmut – ym dei ki kali shimet ba wanrah ka jingdheng kali namar kim ïeng ka kano-kano ka jaka, ki ïaid beit. Kumta phim lah ban ong balei ngi leh ïa kane tang na bynta ki taksi kamai,” la ong ka DC.
Shuh shuh ka la kular ban shimkhia halor ka dor ba la shim da ki taksi bad kiwei-kiwei ki kali kit paidbah wat hadien ba la kut ka khlam COVID-19.
Ha ka jingpeit jong ki bor distrik, ki lad ha Khyndailad bad Motphran ki long kiba khapngiah namar ka jingbun ki kali kiba ap ban kit paidbah bad ka jingbun paidbah kiba ap kali.
