Shillong, Jylliew 12:
Ki katto katne ki nongshong shnong ka South Garo Hills bad East Garo Hills ki la ujor sha ka Meghalaya High Court ha kaba ki la pynpaw ïa ka jingjyllei ka jingtih bad jingkit dewïong be-aiñ.
Nalor ka jingthoh, kita ki nongshong shnong ki la pyni ruh da ki dur ki dar jong ka jinglum thup ïa u dewïong bad ka jingïeng laiñ jong ki trok ban kit ïa une u marpoh khyndew. Ki don ruh ki dur ba la pyni ïa ki nombor jong ki trok kiba la suba ba ki la kit dewïong.
Na ka liang ka High Court ka la bthah ïa u khlieh duh ki pulit ka jylla ba un peit halor katei ka jingujor, bad lada donkam, ban khot ïa ki nongujor khnang ban pynshisha na ki halor kitei ki jingkynnoh.
Ka High Court ka la ong ba kitei ki nongujor ki la pyni ba ka jingtih bad jingkit dewïong be-aiñ ka dang ïaid beit bad ki bor sorkar ki khlem leh eiei satia.
