Shillong, Jylliew 12:
U Myntri ka tnat ri jingri, Bah A.L Hek u la ong ba ka Sorkar kam don ka lad jingïarap kumba ka long mynta lada ïap ki masi na kano-kano ka jingpang kynthup ka jingpang at-sniehdoh, bad u sngew dei ban don noh da ka kynja ‘insurance’ ïa ki jingri.
U Bah Hek u la pynpaw ïa kane haba kylli la ka Sorkar kan ïarap ne em ïa ki nongrep lada ïap ki masi kiba ki ri khamtam mynta ba don ka jingpang at-sniehdoh ki masi ha kylleng.
U Bah Hek u la ong ba ka long kaba donkam ban don noh ka insurance ïa ki jingri khnang ba ki nongrep kin ïoh jingïarap lada jia kano-kano kaba wan lynshop ïa ki jingri jong ki riewshimet ne ki kynhun (society/group).
Haba ïadei bad ka jingïoh pang at-sniehdoh ki masi, u Bah Hek u la ong ba ka tnat ri jingri ka la shim ki lad ki lynti kumno ban khanglad ïa ka jingsaphriang jong kane ka jingpang.
