Tura, Jylliew 13:
Ka A’chik Youth Council (AYC) ha ka Sngi Ba-ar ka la pynsngew sha u Myntri Rangbah ka Jylla, u Conrad K. Sangma halor ka mat ba ïadei bad ka jinghiar jong ka jingdon ki khynnah pule kiba ‘pass’ ha ka eksamin SSLC na Ri-lum Garo bad kyrpad na bynta ban shim ïa ki sienjam jingpynbeit ban pynbha ïa kane ha ryngkat katto-katne ki jingai jingmut na ka liang ka seng.
“Kawei na ki daw haba ïadei bad kane ka dei namar ka jingbym biang ha ka rukom hikai ha ki skul Primary bad Secondary ha kylleng ka Ri-lum Garo. Ngi kyrpad ïa ka ophis ba donburom jong phi ban shim ki lad ki lynti ba mardor ban pynbha ïa ka jinglong-jingman ka rukom hikai ha kine ki skul. Da kaba kyntiew ïa ka rukom long ka pule-puthi, ngi lah ban pynkup bor ïa ki khynnah jong ngi da ki jingnang jingtip kiba donkam bad ki sap pynbit ban kiew ha ka jingpule, ha kajuh ka por ban ïakhun ha kane ka pyrthei kaba la kiew shi kat dei ha kiba bun ki liang,” la ong ka seng ha ka dorkhas ba phah sha u Myntri Rangbah.
“Nalor kane, ngi kyrpad ïa phi ban pyntikna ïa ka jingsiew tulop kaba tista bad biang por sha ki nonghikai ha ki skul Sorkar bad kito ba la kyrshan da ka Sorkar. Ka jingpynslem ne ka jingbym siew tista ïa ka tulop ka lah ban ktah ïa ka jingnang ïoh mynsiem bad jingtrei shit rhem jong ki nongai jinghikai, ha kawei ka liang kaba ktah pat ïa ka jingpule jong ki khynnah. Da kaba buh hakhmat ïa ka jingsiew tista jong ka tulop, ngi lah ban wanrah ïa ka jinglong-jingman ka ban ai mynsiem ïa ki nonghikai ban trei minot kumjuh ban pynleit jingmut kham bha haba phai sha ka jingseisoh jong ki khynnah,” ka la bynrap.
Na ka liang ka seng sa kawei ka mat kaba donkam ban pynleit jingmut ka dei halor ka jingdon jong ki nonghikai ki bym shimkhia ne leh-sting ïa ka kam ha ka liang ka pule-puthi. Ka seng ka kyrpad ruh ïa ka Sorkar ban pynshitom da kaba tyngeh ïa kiba kum kitei ki nonghikai kiba kyntait ïa ka kamram ba la bynshet bad kiba ïapeiñ ïa ka pule-puthi kaba paka.
“Dei ban pynlong ïa ka jingpeitngor kaba na ka por sha ka por ïa ki khynnah bad ka rukom hikai ki nonghikai ban pynithuh ïa ki jaka kiba donkam pynbha, ha kajuh ka por ban shim ïa ki lad jingpynbeit,” la ong ka seng.
Shuh shuh ka AYC ka la tyrwa ban pynlong ruh ïa ka jingleit jurip kaba kynsan-kynsan sha ki skul ha kylleng ka Ri-lum Garo ban ïarap pynithuh ïa ki nonghikai ki bym tista ha ka kam, ban khmih bniah ïa ka jinglong-jingman ka rukom hikai, bad ban pyntikna ïa ka pule-puthi kaba paka sha ki khynnah.
“Kine ki jingjurip kin long ruh kum ka jingpynkynmaw ïa ki nonghikai bad nongpynïaid skul ïa ka kamram, bad ban pynrung ïa mynsiem jingkitkhlieh ha ki haba ïadei bad ka kam ba la bynshet ha ki,” la ong ka seng.
