Nongstoiñ, Jylliew 13:
Ka Hynñiewtrep Youths’ Council (HYC), West Khasi Hills District ha ka 13 tarik mynta u bnai ka la leit ban ai da ka jingthoh bad ïakynduh ruh ïa ka Post Master Post Office Nongstoiñ, West Khasi Hills District ban pyrshah ïa ka jingwan trei ne sam shithi ne Gramin Dak Sewak (GDS) da ki 6 ngut ki bar jylla hapoh ka district, kata ha shnong Byrki, Jaidoh, Mawlieh, Nongtynñiaw, Nongkasen bad Shyrkon.
Ka HYC hapoh ka jingïalam u samla Lumlang Kharsyiemlieh kum u President bad samla Losbingnel Lyngkhoi kum u Assistant General Secretary ki la ong ba hadien ka jingleit ïakynduh ïa ka Post Master, na ka liang jong ka, ka la ïathuh ba 4 ngut ki bar jylla ki la ïoh NOC na ka shnong Ladweitang, uwei na Jaidoh bad uwei na Shyrkon.
Halor kane ka bynta, ka HYC ka maham jur ïa ki bar jylla da kaba ong ba “Phi lah ban ïoh NOC na shnong, hynrei ka HYC kam ailad ban wan trei hapoh West.” Kumta ka HYC ka dawa ba dei ban thung da ki trai shnong.
Shuh shuh ki la ong ruh ba na ka liang katei ka ophis ka la ong namar ïa kine la thung da kaba peit ïa ki percentage ba heh, bad lada kim ai NOC ki shnong kim ïoh ban trei. Kumta ka la kular ban shimkhia bad ban phah ïa katei ka jingdawa ka HYC sha Shillong.
Ha kawei pat ka khubor, ka HYC West Khasi Hills District ha kane ka sngi ka la leit ai jingthoh bad ïakynduh ïa u EE WKH Distribution Division, MePDCL, Nongstoiñ halor ka jingkiew ka bill light watla ka don ka jinglip ding ilektrik (Load Shedding).
Na ka liang ka HYC lyngba ki nongkitkam ka la pynpaw ba kumno haba la pynlip bording 12 kynta shisngi lane 15 kynta shi sngi ha ka shitaïew hynrei ka bill ka neh kumjuh. “Hooid, ka don ka ‘fixed charge’, ngim kren, hynrei ka bill ka dei ban duna bad kumno haba ym don bording ruh ka bill ka ïaid.
Kumta na ka liang ka seng ka dawa ban pynduna bad dei ban shna bha nangne shakhmat, namar kane ka ktah ïa ki paidbah bad ka long kumba lute ïa ka hok jong ki.
