Shillong, Jylliew 13:
Ka jingkieng kaba don halor jong ka bynta ba den ïa ka pung Umïam ka long kaba shngaiñ ban ïaid ki kali, hynrei ki kynja nar (bearing) kiba kyrshan ban pynduna ïa ka jingtyngkhuh hapdeng ka jingkieng bad ka kynroh ba den ïa ka pung ki dei kiba la kham rim bad donkam ban thep thymmai.
Ïa kane la ïathuh da u Managing Director ka Meghalaya Energy Corporation Limited (MeECL), u Sanjay Goyal haba jubab ïa ka jingkylli halor ka jinglong jingman ka jingkieng hadien ba la dep ban phah khmih bniah la bunsien da ki kynhun bapher bapher kiba don ka jingshemphang.
Kumta u la ong ba haba ïadei bad ka jingkieng, ka long kaba shngaiñ hynrei kaba kham hakhmat ban leh ka long ban thep thymmai ïa ki ‘bearing’ kiba pynduna ïa ka jingkyrshut hapdeng ka jingkieng bad ka kynroh ba den ïa ka pung Umïam.
U Goyal u la ong ba ynda la biang ka por ban thep thymmai ïa ki ‘bearing’ yn sa leh ïa kata bad ki la don bun tylli ki kynhun kiba la khmih bniah ïa ka jinglong jingman ka jingtei ba den ïa ka pung bad ka jingkieng ba ïaid ki kali ha ka bynta kaba halor jong ka jaka ba den.
U la ong ba na ka bynta ban maramot ïa ka jingtei kum ka dam, ka Sorkar Pdeng ruh ka la mang pisa ïa ka Meghalaya kaba la kot sha ka T.180 klur. Na kane, kumba T.50 klur la nang pyllait ïa ka pisa ban nang leh ïa ki kam maramot kiba kham rit kiba la sdang ban maramot ïa ki dam kum ka Leshka bad kiwei kiwei.
U Goyal u la ong ba kane ka jingmaramot ïa ki dam ka dei lyngba ka skhim kaba tip kum ka Dam Rehabilitation and Improvement Project (DRIP) lyngba ka jingbei pisa ka World Bank ka ban kut haduh u snem 2025.
U Goyal u la ong ruh ba wat lada ka pung Umïam ka la nang kham kiew ha ka jingdon ka um naduh ba bteng ka jinghap slap, hynrei ym pat lah satia ban weng ïa ka jingpynlip bording ilektrik.
U la ong ba nalor ka Umïam, kiwei kiwei ki projek pynmih bording ilektrik naduh ka Myntdu-Leshka, Ganol, Umtrew ki la ïarap ban pynmih bording ban pyllang ha ka Grid ban sam bording ha kane ka Jylla.
