Shillong, Jylliew 13:
Ka Meghalaya High Court ka la thalaiñ tyngeh ha ka Sngi Ba-Ar halor ka jinglong jingman jong ka surok Jowai Bypass wat la ka tnat PWD ka sorkar jylla ka la maramot.
Ha kane ka sngi, ka High Court ka la bishar biang ïa ka mukotduma ba la ai da u Bah Kynjaimon Ames pyrshah ïa ka National Highways Authority of India (NHAI) bad kiwei, bad na ka liang ka sorkar jylla ka la ai ïa ka kaiphod ha kaba ïadei bad ka Jowai Bypass katba ka NHAI ka la ai ïa ka kaiphod halor ka NH-6 hapdeng ka Jowai bad Ratacherra.
Na ka liang ka ïingbishar ka la shim ruh ïa ki dur ki dar ba la pynmih ha ki kotkhubor ha ki khyndiat sngi ha kaba ïadei bad ka jinglong jingman ka surok Jowai Bypass wat la ka PWD (Roads) ka la dep ban maramot ïa kane ka surok. U nongmudui ruh u la pyni da ki dur ki dar ban pyni ba kata ka jingmaramot ka khlem neh wat tang khyndiat sngi.
Ka High Court ka la kdew ba wat la ka rong surok ka um bad u slap ba jur u lah ban ktah ïa ka surok, hynrei ka jingtor jong ka surok Jowai Bypass ka la sdang wat hashwa ban wan u slap lyiur.
Nalorkata, ka la ong ba ym lah ban ai daw, khamtam ba kane ka thaiñ ka ju ïoh ïa u slap ba jur ha ka por lyiur, ba ki surok kin ym long ban ïaid kali ha ka por slap. Ïa ka jingmaramot surok yn hap ban leh da kaba buh jingmut ïa ka jinglong jingman ka suiñ bneng bad u slap ba ka surok kan hap ban shah.
Na ka liang ka High Court ka la bthah ïa u muktiar jong ka sorkar ban ïakynduh ïa ki heh ka tnat PWD (Roads) ban ïakren halor katei ka surok bad kumno ban maramot ïa ka shwa ban wan u slap lyiur.
Katba na ka liang ka NHAI ka la kdew ba ki don ki bynta jong ka surokbah NH-6 hapdeng ka Jowai bad Khliehriat kiba la donkam ban maramot. Ym tang katta, la donkam ruh ban maramot ïa ka ‘tunnel’ kaba ha Sonapur. Ka NHAI ka la pyntip ba ïa ka kam kontrak yn sa ai noh shen bad la khmih lynti ba ïa ka jingmaramot yn pyndep haba kut u Naitung 2023.
Hynrei ka High Court ka la ong ba kan jin da la bha shibun lada ïa ka jingmaramot la pyndep ha shwa ban wan u slap lyiur. Tangba ka la ai jingmut ïa ka NHAI ba kan peit bha khnang ba ka jingmaramot hapdeng jong u slap kan ym shah rong noh mardor tang mar ïa dep trei.
Ka High Court ka la bthah ïa ka sorkar jylla bad ka NHAI ki dei ban ai jingtip ha ka taïew ban wan halor ka jingïaid jong ka kam.
Na ka liang u nongmudui u la kdew ba ka la don ka jingtwa khyndew ha ki bnai kiba la leit noh ha ka lynti na Malidor sha Ratacherra, hynrei ym pat shym la leh eiei halor kane. Ka High Court ka la bthah ïa ka NHAI ba kan peit ïa kane bad ban khat noh ïa ka khyndew bad ki maw kiba la twa bad ha kajuh ka por, ban maramot kham kloi.
Ka High Court ka la ong ba ka NH-6 ka dei ka surokbah kaba kongsan ha kane ka thaiñ North-East bad namarkata, donkam ba kan long kaba bha na ka bynta ban ïaid kali baroh shi snem.
