Shillong, Jylliew 13:
Ka Voice of the People Party (VPP) ka la ong ba ka Sorkar ka dei ban lum jingtip halor ki briew kiba wan poi na Manipur sha Meghalaya khnang ban ïoh phah biang ïa ki sha ka Jylla lajong ynda ka jinglong-jingman ka la manbha.
“Bun ki nongshong shnong na Manipur kiba la wan shane namar ka jingïakynad ha ka Jylla lajong. Hooid, ngi sngew burom ïa ka Sorkar kaba long la kloi ban ïarap ïa kine ki briew, hynrei, ha kajuh ka por ka dei ban lum jingtip ruh – katno ngut kiba wan sha ka Jylla khnang ba kin ym kylla long ki nongshong shnong ba pura hangne,” la ong u General Secretary ka seng, Dr. Ricky A.J. Syngkon ha ka Sngi Ba-ar.
Utei u nongïalam u la ong ruh ba ynda ka jinglong-jingman ha Manipur ka la manbha, kitei ki briew kiba wan shane, ki dei ban leit phai noh sha ka Jylla lajong.
U Dr. Syngkon u la bynrap ba ka seng kan sa phah jingthoh ruh sha ka Sorkar haba ïadei bad kane ka bynta.
Kum ban shu kdew hangne, ka jingïakynad kaba jur ka la mih ha Manipur ha ka 3 tarik u Jymmang hadien ka jingïaid paidbah ‘Tribal Solidarity March’ kaba la long ha ki distrik jong ki jaka lum katei ka Jylla kum ka dak ban pyrshah ïa ka jingdawa ki jaidbynriew Meitei ban shah kynthup kum ki ‘Schedule Tribe’.
Ha kane ka jingjia kaba la neh la shi bnai tam, ka Jylla ka la sakhi ïa ka jingduh noh jong bun ki mynsiem briew bad ka jingshah pynjulor jong kiba bun tylli ki ïing ki sem jong ki paidbah bad ki ïingmane jong ki kynhun niam bapher-bapher.
Ka jingpynrung dkhot sha ka seng:
Ha kawei ka liang, ka VPP ïa mynta ka dang ïaid shakhmat bad ka jingpynrung dkhot ha kylleng ka Jylla khamtam ha kito ki konstitwensi kiba ka seng kam shym la pynïeng kyrtong ha kane ka ilekshon ba la dep.
“Ngi dang bteng ïa ka jingpynrung dkhot sha ka seng. Ngi la dep ha kiba bun tylli ki jaka bad ngin sa leit sa sha Umsamlem, Sohïong, Umsning, Mawhati bad kiwei-kiwei. Ki don ruh ki jaka ba ki paidbah ki kwah ïa ka seng ban wan pynlong jingïalang khamtam ha ki konstitwensi ba ngi khlem pynïeng kyrtong ha kane ka ilekshon ba la dep,” la ong u Dr. Syngkon.
Haba kylli, u General Secretary u la ong ba ka jingpynrung dkhot jong ka seng kan long ha baroh 60 tylli ki konstitwensi.
“Ka VPP ka dei ka seng saiñ pyrthei ba la ithuh hapoh ka Jylla (State Party) bad ka jingthmu jong ngi hi ka long ban rung sha baroh ki konstitwensi,” u la ong.
