Shillong, Jylliew 13:
Ka sorkar jylla ka la khot la wer ïa ki trai jaka ba kin wan shakhmat ban tyrwa die jaka namar ka thmu ban shna ïa ka jaka theh ñiut bad ka jaka pynkylla ïa ki ñiut na ka bynta ka sor Jowai (Scientific Sanitary Landfill Site & Waste Processing Centre for Waste Management).
Ki nongshong shnong kiba don jaka ba heh palat 50 Acre ki lah ban wan shakhmat ban ai da ka jingthoh ryngkat bad ki kopi jong ki kot ki sla khyndew ba kynthup ïa ka ‘Survey Map’ jong ka jaka sha ka shlem treikam jong ka Chief Executive Officer (CEO) ka Jowai Municipal Board ha lane shwa ka 3 tarik Naitung, 2023.
Nalor ba ka jaka kan hap ban heh palat 50 Acre, ka dei ruh ban jngai 100 meter na ki wah, 200 meter na ki jaka ba don um, 200 meter na surokbah, shnong, jaka shongkai paidbah bad ki tyllong sam um.
Shuh shuh ka jaka ban pynlong kum ka jaka theh bad pynkylla ïa ki ñiut kam dei ban don ha ki jaka ba ju dap um lane ki jaka kiba don ïa ki sim ki doh, ki mrad ki mreng bad ki jingthung jingtep.
