Shillong, Jylliew 13:
Ka jingkyrduh pisa ka Meghalaya Energy Corporation Limited (MeECL) kam dei shuh kaba dang thymmai. Kawei na ki daw ba kam ïoh kynshew tikna ïa ka pisa ka dei ka jingbym siew tista ki nongpyndonkam ïa ka ding ilektrik, kita, naduh ki paidbah kiba pyndonkam bording ilektrik ha la ki ïing ki sem, bad ki karkhana kiba pyndonkam ïa ka ilektrik ha kane ka Jylla.
Katkum ka jingkheiñ ka MeECL, la ong ba ka pisa na ka bai bording ilektrik kaba ka MeECL ka dang sahkut bad dang dei ban ïoh lum ka kot da ki spah klur tyngka.
Haba ïakren bad u Managing Director ka MeECL, u Sanjay Goyal ha ka sngi ba-ar, u la ïathuh ba lada kheiñlang lut ïa ka pisa kaba dang dei ban ïoh lum ïa ka bai thang ilektrik na ki paidbah bad na ki karkhana kumjuh ruh na kito kiba leit ïakhun mukotduma kynthup ka jingpynsngew sha ka Central Electricity Regulatory Commission (CERC), ka pisa kaba dang dei ban ïoh ka MeECL ka la kot sha ka T.300 klur.
Haba kylli halor ka bai bording ilektrik ba pynsahteng ki tnat treikam bapher bapher ka Sorkar kynthup ki ïing Sorkar, u Goyal u la ong ba ka bai bording ilektrik kaba sahteng bad dei ban ïoh na ki tnat treikam ka Sorkar kam da katta katta eh, bad ka Sorkar Jylla hi ka ju ïarap pisa ïa ka MeECL ha ka jingtreikam jong ka naduh ka jignthied bording bad kiwei kiwei ki jingïarap.
U Goyal u la ong ba ka bynta kaba kham hakhmat eh haba ïadei bad ki karkhana nalor ka pisa kaba dang dei ban ïohlum, ka dei ka jingkheiñ dor ïa ka bai pyndonkam ilektrik namar ka dor kaba buh da ka State Electricity Regulatory Commission (SERC) ka dei kaba kham rit.
Kumta u la ïathuh ba na ka liang ka MeECL ka la phah ka jingpynsngew (petition) sha ka SERC bad ka shong ha ka Commission ban khmih bniah bad buh dor.
