Shillong, Jylliew 13:
Ki pulit ka nongbah Shillong ha ka sngi Nyngkong ka 12 tarik mynta u bnai, ki la lap ïa ka samla lud kaba la jah rngai mynta la kumba 10 sngi na skul St. Margaret’s, Laitumkhrah ha kawei ka jaka kaba don ha West Bengal.
Kane ka samla lud kaba dang 17 snem ka rta, ka dei kaba shong ba sah ha Upper Mawprem. Kane ka samla ka la jah rngai naduh ka 2 tarik Jylliew 2023 napoh ka skul St. Margaret’s, la pyntip u Superintendent of Police ka East Khasi Hills.
Katkum ka jingong jong u, ki pulit ka thanad Laitumkhrah ki la pynrung case halor kane ka jingjia hapoh ka kyndon 363 IPC. Na ka liang ki pulit ki la pynlong ïa ka jingtohkit ba khlem shongthait ban lapdien ïa kane ka khynnah samla.
Shuh shuh na ka liang jong une u heh pulit u la pyntip ruh ba ki la lap ksai halor kane jingjia bad ki pulit ka East Khasi Hills hapoh ka jingïalam u Sub Inspector Md Kayum, ki la hiar sha West Bengal ban wad ïa kane ka khynnah.
U ïathuh ba dei ha ka 12 tarik Jylliew ba ki pulit ki la lap ïa kane ka samla lud na ka sor Malda, West Bengal. Kumta na ka liang ki pulit ki la wan ïalam noh ïa kane ka samla sha Shillong bad la aiti noh ïa ka sha ki bahaïing.
